Erro zuri-gorri sakon eta indartsuak Gipuzkoan

Ohikoa den legez, kolore zuri-gorrien isla nabarmena izan zen Donostian, Athletic Clubek Gipuzkoan duen babes sozialari esker. Bertatik etorritako zaleekin batera, hainbat izan ziren beste lurralde batzuetatik Ernesto Valverdek zuzentzen duen taldea bultzatzera hurbildu zirenak. Gipuzkoan egituratutako babesa, lurraldeko zaletu taldeek, hitzartutako klubek eta Athletic Clubek 125 urte hauetan jokatu duten jokalari ugarik utzitako arrastoan oinarritzen da. Horrekin batera, familien baitako erro eta tradizioak, Klubaren kirol politikarekiko atxikipenak zein izate sentimendu indartsuak babes hori biderkatu eta sostengatzen dute.

Kirol alorrean, beste behin ere, bi taldeek intentsitate handiz lehiatutako derbia izan. Zoritxarrez, lehoiek ezin izan zuten esperotako emaitza lortu, baina azken segundora bitarte ahalegin betean aritu ziren. Reale Arenanen bertan zein Donostiako kaleetan, zaletuen presentzia nabaria izan zen eta kamiseta zuri-gorriak nonahi ikusi ziren

Partidako Inside estilo bideoak, Athletic Clubek Gipuzkoan duen oinarri zabala irudikatzen da. Horretarako, Jose Angel Iribarren, Klubeko mito zarauztar erraldoiaren, testigantzatik abiatuta, Aitor Huegun (Donostia) eta Eli Ibarra (Azkoitia) jokalari ohiek, Anjel Mari Peñagarikano (Albiztur) eta Jon Maia (Zumaia) bertsolariek zein Igor Hilario zale tolosarrak euren sentimendu zuri-gorriak islatzen dituzte. Ez dira bakarrak, izan ere, Reale Arena estadioaren kanpoaldean, bestelako herrietatik hurbildutako zuri-gorriekin elkartzeko beta izan genuelako. Euren artean, Maiderrekin, Estanis Argote hegaleko zarauztar bikainaren ilobarekin. Laburbilduz, Euskal Herrian sortu eta oinarritutako taldearen erro sakonen irudikapena.