Thinking Football 2024ko itxiera bikaina

Thinking Football Film Festival 2024 jaialdiaren XII. edizioari amaiera emateko, elkarren artean oso desberdinak diren baina espiritu komuna duten bi film proiektatu dira. Athletic Club Fundazioaren zinemaldiaren zigilu soziala islatzen dute. "Hamaika andra zurigorri" eta "Un gran equipo" ekoizpen zinematografiko erabat desberdinak dira, baina biek ala biek futbolaren inguruan biraka dabiltzan istorioak kontatzen dituzte. Akaitze Kamiruagak zuzendutako "Hamaika andra zurigorri" dokumentalean genero berdintasunaren aldeko borroka da gaia. Marc Rothemunden film alemaniarrean, interes sozialeko gai hori Aspergerren sindromea da.

Bi filmetako protagonistak BBK Aretoan izan dira eta Thinking Football zinema-jaialdietako glamour berezi horretaz hornitu dute. Ginga, gainera, emakumezkoen lehen taldeko jokalariek eta Lezamako harrobiko taldeen ordezkaritza handi batek jarri dute. Azken finean, amaiera bikaina izan du aurten ere proiekzio gehienetan "Sarrerarik ez" kartela eskegi duen edizioak.

Balio historiko, sozial, kirol eta emozional handiko testigantzen ikus-entzunezkoa

"Hamaika andra zurigorri" lekukotasunen ikus-entzunezkoa da, Labayru Fundazioak,  Athletic Club Fundazioa eta AC Museoarekin lankidetzan egina eta Bizkaiko Foru Aldundiak finantzatua. Historia zuri-gorrian garrantzitsuak diren emakumeen talde bat (ehunka ordezkatzen dituen hamaikako bat) du protagonista, bai gizarte arloan, bai kirol arloan.

Akaitze Kamiruaga zuzendariak Ana Astobieta, Mari Mar Boillos, Ane Elexpuru, Ernestina Dosantos, Sara Estévez, Lore Etxebarria, Pura Fernández, Begoña González, Eli Ibarra, Mª Ángeles Ibarrolaza, Jose Angel Iribar, María Jesús Irureta, Iraia Iturregi, Iñigo Juaristi, Inma Legarreta, Ana Lekuona, Vicky Martínez, Ana Mari Mendizabal, Itziar Muriel, Garazi Murua, Arrate Ojinaga, Nerea Onaindia, Begoña Oraa, Paula Oraa, Nerea Ortiz, Maríe Elena Ouro, Marieli Oviedo, Portero, Argi Portero, Ana Reka, Edurne Salsamendi, Inma Sanchez, Garazi Unibaso, Ana Urquijo eta Ernesto Valverde elkarrizketatu ditu erreportajean.

Dokumentaleko protagonista asko BBK Aretora joan dira eta, publiko orokorra bezala, hunkitu egin dira lekukotasun sorta batekin eta Athletic sentimendua fideltasunez transmititzen duen muntaia zinematografiko batekin.

Asperger unibertsoa

Thinking Footballaren XII. edizio honetako azken filma, "Un gran equipo", Aspergerrekin arazoak dituen haur baten benetako kasu batean oinarritutako film eder eta zirraragarria da. Jason von Juterczenka eta bere aita Mirco BBK Aretoan izan ziren Asperger sindromea duten pertsonen unibertsoa ulertzen laguntzen duen filmari buruz hitz egiteko.

Gainera, joan den igandean San Mamesen jokatutako derbia ikusi zuten aita-semeek eta zelaian bizi izan zuten giroaz hitz egin zuten. Asperger duen pertsona batentzat, bere inguruko guztiak modu ordenatuan eta ezustekorik gabe funtzionatu behar du. Gertatzen ari denaren pertzepzio sentsoriala aldatzen duen edozein alderdik kontrolik eza eragin dezake, beraz Athletic Clubek Realari irabazi izana Jason gaztearentzat suzko froga ona izan zen. Bere hitzetan, "futbol partida asko ikusi ditugu, 140 inguru. Ez dugu talde gogokoena bakarrik Alemanian bilatzen. Asteburu hau berezia izan da. Neurketa oso modu bakarrean bizi izan dugu, Athletic Cluben historia bertatik bertara ezagutu dugulako. Klubak atea ireki dizkigu lehen pertsonan zein berezia den ezagutzeko. Orain arte ikusi dugun norgehiagoka zaratatsuena izan da. Alemanian, harmaila batek kantatzen duenean, besteak isilik irauten du, baina hemen ez da horrela. Zelai osoa kantari eta oihuka ari da batera. San Mameseko zaratak eta akustikak harritu egin gaituzte. Partida ahaztezina izan da".