Iñigo Lekuek Athletic Cluben jarraituko du 2026ra arte
Iñigo Lekuek Athletic Cluben jarraituko du 2026ra arte
Atzelari zuri-gorriak lehen taldearekin duen konpromisoa luzatu eta hamarkada gainditzen duen ibilbidea erdietsiko du
Athletic Clubek akordioa lortu du Iñigo Lekuerekin bere kontratua beste denboraldi baterako berritzeko. Horrela, 2026ko ekainaren 30era arte izango du lotura Klubarekin. Jubenil mailako Danok Bat taldetik 2012an heldu zenetik Lezaman hezitako Deustuko jokalariak hamaikagarren denboraldia egingo du lehoi gisa. Akordioa San Mamesen sinatu da, Jon Uriarte presidentearekin eta Mikel Gonzalez Futboleko zuzendari nagusiarekin.
262 partida ofizial ditu bere soinean, horietatik 53 azken bi denboraldietan, non Lekue funtsezko jokalari gisa finkatu dena, zelaiko hainbat eremutan aritzeko duen gaitasunagatik. Urte honetan ohiko bilakatu da bi hegaletan jokatzen ikustea, errendimendu bikaina eskaini du denboraldiaren azken txanpan, eta denboraldiko helburu guztiak jokoan zeudela, defentsan maila altua erakutsi du.
Aldagelako egungo kapitainetako batek, Ernesto Valverderen eskutik egin zuen debuta 4-0 historikoan, 2015eko Superkopan FC Barcelonaren aurka, Klubarekin lortu dituen hiru tituluetako lehenean.
Berrikuntza Klubaren kontratu-politikaren barruan sartzen da, soldata-oinarri egonkorra eta kirol-errendimenduari lotutako pizgarriak konbinatzen baititu.
Lekue pozik agertu da elastiko zuri-gorria janzten jarraitzeagatik: "Niretzat berritze hau kirol arloan eta pertsonalki sekulakoa da. Zoragarria da amets hau bizitzen jarraitzea. Denboraldi honetan, taldeak erakutsitako lehiakortasun-sentsazioa ez dut gainerakoetan izan. Egia da pasa den denboraldian, 40 urteren ondoren, Kopa lortu genuela, Gabarra atera genuela eta Europan sartu ginela berriro, eta ahaztezina izan zela, baina aurtengoa, sendotasunari dagokionez, daramadan onena izan da", adierazi zuen.
Bestalde, Mikel Gonzalezek azpimarratu du zelai barruan eta kanpoan pisua duen jokalari baten jarraipena mantentzeak balio handia duela taldearentzat: "Protagonismo handiko denboraldi batetik zetorren, minutu gehien izan zituzten hamaika jokalarien artean. Aurten, bere parte-hartzea jaitsi bada ere, oso garrantzitsua bilakatu da egunerokotasunean, eta inork baino gehiago lan egiten jarraitzeko indar mentala izan du. Bere aukeraren zain egon da, azken fase honetan partida garrantzitsuetan errendimendu ona lortuz. Bi alboak estaltzen ditu. Bigarren kapitaina izatera pasa da, eta Athleticen balioak bikain islatzen eta transmititzen ditu".