"Hitza", aldi baterako erakusketa berria AC Museoan

AC Museoak Hitza/La Promesa/The Promise aldi baterako erakusketa inauguratu du gaur, lorpenaren 70. urteurrenean. Proposamen berri horrek Athletic Cluben historiako orrialde distiratsuenetako bat berpiztera gonbidatzen du: 1955-56 denboraldia, non taldeak bere ibilbidearen laugarren bikotea (Liga eta Kopako txapeldun) lortu zuen.

Ferdinand Daucik entrenatzaileak aurreko urtean, 1955eko Kopa irabazi ondorengo harreran, udaletxeko balkoitik egindako promesa gogoangarritik hartu du izena erakusketak. Zale zuri-gorrien aurrean, entrenatzaileak ziurtatu zuen hurrengo denboraldian ez zela titulu batekin itzuliko, birekin baizik. Eta hitza bete zuen.

Inaugurazio-ekitaldian izan dira Jon Uriarte Athletic Clubeko presidentea, bertaratuei ongietorria emateaz arduratu dena; Jon Ruigomez lehendakariordea, erakusketaren testuinguruan kokatu duena; Asier Arrate AC Museoko zuzendaria, aldi baterako erakusketa honen motibazioa azaldu duena; eta Lander Iraragorri, garai hartako jokalari ohia. Gainera, Jose Angel Iribar, Andoni Goikoetxea eta Manolo Delgado Meco ere bertan izan dira.

Erakusketa honen bidez, AC Museoak arrakasta hartan funtsezkoa izan zen Daucik entrenatzailearengan jartzen du arreta. Aldi berean, erakusketak omenaldia egiten die balentria hori posible egin zuten jokalariei, eta Klubaren memoria kolektiboa gordetzearen garrantzia aldarrikatzen du.

Hitza/La Promesa/The Promise erakusketak ibilbide erraz eta oroigarria aurkezten du, sei beira-arasaz, sei testu-oihalez eta ikus-entzunezko pieza batez osatua. Oro har, garai hari lotuta dauden jatorrizko 50 eta 75 objektu inguru biltzen ditu.

Pieza gehienak AC Museoaren bildumakoak eta artxibokoak dira: garaikurrak, aldizkariak, jokalari-lizentziak, gutunak edo kartel historikoak. Horiei partikularrek emandako edo lagatako materialak gehitzen zaizkie, besteak beste, kamisetak, botak, baloiak, banderatxoak, jokalari-txartelak, argazkiak eta jatorrizko sarrerak.

Proposamen berri honekin, AC Museoak Athletic Cluben historia zaleei eta bisitariei hurbiltzen jarraitzen du, belaunaldiz belaunaldi erakundearen nortasuna eraikitzen jarraitzen duen ondarea balioetsiz.

Erakusketa azarora arte egongo da zabalik. Erakusketa museoaren ohiko eskaintzaren osagarri da (bilduma iraunkorra eta San Mamesetik Tourra). Bertara joateko nahikoa da museorako eta Tourrerako sarrera erostea, prezioa igoerarik gabe.
 

ZURE SARRERA EROSI