Patri Zugastik eta Bibi Schulzek alta medikoa jaso dute

Athletic Clubek albiste onekin ekingo dio liga amaierari, hilabete batzuk zelaietatik urrun zeramatzaten bi jokalari berreskuratzearen berriarekin. Patricia Zugasti eta Bibiane Schulzeren kasua da. Biak Granada CF-ren aurkako deialdian sartu daitezke, Liga F-ko bueltan, larunbat honetan, 12:00etan. 

Nafarroako aurrelaria da bakarka lanean denbora gehien eman duena, ezker belaunean mina hartu ostean. Kondropatiak, hau da, errotularen atzeko aldean kartilagoa higatzeak, Riezukoak abenduan gelditu behar izatea eragin zuen, tratamendu kontserbatzaile bat hasteko eta aipatutako mina leuntzen saiatzeko. Bakarkako lanarekin eta hilabete batzuk txapelketatik urrun, orain itzuliko da 2025-2026 denboraldiari amaiera emateko geratzen diren bost partidetan bere aletxoa eskaintzen saiatzeko.

Bibiane Schulze, berriz, urtarrilaren amaieran igaro zen ebakuntza-gelatik, artroskopia bat egiteko eta, horrela, belauneko atxikidurak garbitzeko. 2024ko irailean aurreko lotailu gurutzatuko lesio larria jasan zuen. Operaziotik karga pixkanaka handitu eta entrenamenduetara sartu ondoren, Bibi beste aukera bat izango da defentsari dagokionez F Ligako azken norgehiagoketan.