"Inor ez dago erlaxatzeko unean egon behar"

Javi Lerga Athletic Clubeko entrenatzaileak adierazpenak egin ditu bihar Lezaman Granada CF taldearen aurka jokatu aurretik. Talde zuri-gorria berriro lehiatuko da F Ligan, bi asteko etenaldiaren ostean. Patricia Zugasti eta Bibiane Schulze deialdiko zerrendara itzuliko dira, bi lesio gainditu ostean. Bestalde, Maite Zubietaren baja baieztatu du entrenatzaileak 12:00etan 2. zelaian hasiko den partidarako.

Lergak gogorarazi du talde andaluziarra "bigarren itzuliko talderik onena" dela "Bartzelonarekin batera". Nafarroako entrenatzaileak badaki Irene Ferrerasen taldea "sasoi bikainean" datorrela eta partida parekatua espero du. Biharko arerioa "aldakortasun eta mugikortasun handiko taldea da. Geldikako eta bigarren jokaldietan oso bizirik dago. Gakoa zelai erdian egongo da", esan du Athleticeko entrenatzaileak, eta atea hutsean uzteko garrantzian jarri du arreta. Izan ere, Granada CFk golik jaso gabe irabazi ditu ligako azken lau partidak.

Azken txanparako anbizioa

Biharkoa denboraldia amaitzeko geratzen diren bost norgehiagoketatik lehena izango da: "Denboraldia ondo amaitzea funtsezkoa da", adierazi du Lergak, eta Athleticentzat eman diren gorabeheretara etengabe egokitzeko urtea izan dela azaldu zuen. Gainera, "jakin badakigu denok geratzen garela azken txanpako zaporearekin. Bost partidak aurrera ateratzeko pentsamoldea dugu eta ahalik eta gorenen amaitzeko anbizioa dugu". Lehoiek etxean jokatuko dute talde andaluziarraren aurkako norgehiagoka, eta, Lergak dioen bezala, beti da berezia "gure jendearekin" jokatzea, eta zaleen aurrean lehiatzeak dakarren erantzukizunari erantzutea espero du.

Lehoiek Ligako azken partida irabazi zuten Buñolen, Levante UD estu eta larri baten aurka, eta horrek moral handia ekarri zien lehoiei. Liga amaierari begira, teknikari zuri-gorriak uste du orain "guztiok asko dugula jokoan, eta orain gertatzen denak etorkizunerako balioa du. Erreginaren Kopako postuak lortzeko borroka ere badago. Gaur egun F Ligan dauden jokalariak ez daude erlaxatzeko unean egon behar. Entrenamendu eta partida bakoitzak bere pisua du".