"Hiru puntu oso garrantzitsu ditugu jokoan gora begiratzeko"

"Alde bietatik jokoan asko duen derbia izateaz gain, partida gutxi geratzen dira eta neurketa bakoitzean jokoan dagoena nabaritzen da. Biharkoa oso norgehiagoka garrantzitsua da sailkapenaren ikuspuntutik. Partida bakoitza borroka bat da eta daukagun aukera aprobetxatu nahi dugu". Ernesto Valverde hedabideen aurrean agertu da Alavesek eta Athleticek Mendizorrotzan jokatuko duten derbiaren atarian. Dena erabakitzeke dagoela sartu gara txapelketaren azken hilabetean: "Denboraldia ez da amaitu eta jokalari guztien bertsiorik onena behar dugu. Bihar irabazi behar dugu eta puntuak batu behar ditugu. Dena oso berdinduta dago eta gora begiratu nahi dugu. Erantzukizun handia dugu, ditugun puntuak ez direlako nahikoak behera begiratzeari uzteko. Biharko partida gora begiratzeko jomugan dago".

Entrenatzaile zuri-gorriak 500 partida beteko ditu bihar Athleticen agindupean. Lehoiek bihar irabazteke dutena ikusita bigarren maila batean geratzen den erregistro aparta: "Zifra garrantzitsua da eta ez dut ukatuko buruan izan dudala. Erantzukizuna sentitzen dut eta denbora pasatzean gehiago baloratuko dut. Orain partidaren garrantzia eta gauden egoera besterik ez dut sentitzen. Gasteizen izateak bereziago egiten du, nire auzotik gertu. Bihar ikusiko dugu seinale bat den ala ez".