Naroa Uriartek futbola utziko dut

Naroa Uriartek amaiera emango dio bere futbolari ibilbideari. Lesioek gogor zigortuta, bakiotarrak bere bizitzako etapa hau ixtea eta erronka profesional berri bati ekitea erabaki du. Atzelari bizkaitarrak 38 partida ofizial jokatu ditu guztira, gol bat sartuta, eta omenaldia jasoko du maiatzaren 31n Lezaman, igandean, 16:00etan Alhama CF taldearen aurka jokatuko den ligako azken partidaren atarikoan.

Bizkerre FTn hezia, duela hamar urte iritsi zen Lezamara, 15 urte besterik ez zituela, Athleticen bigarren taldean jokatzeko. Bigarren taldean etengabeko hazkundearena izan zuen, eta 2018an munduko eta Europako txapeldun izan zen Espainiako 17 urtez azpiko selekzioarekin. Lehen taldearekin debuta 2020ko otsailean egin zuen, Angel Villacamparen eskutik, Real Betisen Kirol Hirian. Hurrengo denboraldian, abenduan, ezker belauneko aurreko lotailu gurutzatua hautsi zuen.

2023-2024 denboraldian Granada CFn aritu zen utzita Liga Fn, eta hurrengo sasoian, 2024-2025ean, berriz ere errepikatu zuen lagapena. Zoritxarrak berriro jo zuen lehoia, eta 2024ko azaroan, denboraldia hasi eta gutxira, eskuin belauneko aurreko lotailu gurutzatua hautsi zuen.

Ordutik, bakiotarrak errekuperazio prozesu luzea bizi izan du, bakarkako lanordu askorekin. Athleticen aldagelan beti gogoratuko dira bere eguneroko jarrera, erresilientzia eta taldekideekiko gertutasuna.

Athleticek eskerrak eman nahi dizkio Naroari Klubaren armarria defendatzen eman dituen urte guztiengatik, eta zorterik onena opa dio etorkizunari begira.