2026ko Ohiko Batzar Nagusirako deialdia

Athletic Clubeko Zuzendaritza-Batzordeak bazkide konpromisarioak Ohiko Batzar Nagusira deitzen ditu. Batzarra 2026ko urriaren 28an, asteazkenean, egingo da, 18:00etan, Bilboko Euskalduna Jauregiko Auditorioan, lehen deialdian, eta behar den quoruma lortzen ez bada, leku berean eta 18:15ean, bigarren deialdian, honako honen arabera:
 

GAI-ZERRENDA

Lehenengoa: Zuzendaritza-Batzordeak aurreko ekitaldi ekonomikoan egindako kudeaketa aztertzea eta, hala badagokio, onartzea.

Bigarrena: Aurreko ekitaldi ekonomikoaren Urteko Kontuak aztertzea eta, hala badagokio, onartzea.

Hirugarrena: Futbol Profesionaleko Liga Nazionalak baliozkotutako aurrekontua aztertzea eta, hala badagokio, onartzea. 

Laugarrena: Hauteskunde-Batzordea, Diziplina-Batzordea, Apelazio-Batzordea eta Kontrol, Gardentasun eta Gobernu Onaren Batzordea osatuko dituzten titularrak eta ordezkoak izendatzea.

Bosgarrena: Konpromisarioen Batzarrerako deia egin ondoren, bazkideek aurkeztutako proposamenak aztertu eta, hala badagokio, onartzea, Estatutuen 23.3 artikuluaren arabera.

Seigarrena: Galde-eskeak.
 

Bazkideei honako hauek jakinarazten zaizkie:

Lehenengoa: Bazkideen eskura egongo da Estatutuetako 32.4 artikuluan ezarritako dokumentazioa, deialdia egiten den egun beretik.

Aipatutako dokumentazioa eskuragarri egongo da kontsultatu ahal izateko, euskaraz zein gaztelaniaz, formatu digitalean Klubaren webguneko Bazkideen Txokoan, eta paperean, Klubaren egoitza sozialean eta Bazkideen Arreta Bulegoan, Batzar honen deialdia egiten den unetik aurrera.

Bigarrena: Estatutuetako 32.1 artikuluan xedatutakoarekin bat etorriz, bazkide konpromisarioek, Batzarra egin aurretik edo Batzarra egiten ari den bitartean, Gai-zerrendan jasotako gaiei buruz beharrezkotzat jotzen dituzten informazioak edo argibideak idatziz eskatu ahal izango dituzte.

Eskubide hori Klubari zuzendutako jakinarazpenaren bidez edo Klubaren webguneko Bazkideen Txokoan gaitutako sistemaren bidez baliatu ahal izango da (www.athletic-club.eus).

Zuzendaritza-Batzordea behartuta egongo da eskatutako informazioak edo argibideak ematera, salbu eta, haren iritziz, eskatutako datuak argitaratzeak Klubaren interes sozial eta kirol-interesei kalte egiten badie edo datu pertsonalen babesari buruz indarrean dagoen legeria urratzen badu. Ukatze hori Konpromisarioen Batzarraren aurrean arrazoitu beharko da. Ukatzea botoen gehiengo soilaz baliogabetu ahal izango da, konpromisarioen gutxienez ehuneko hogeiak (%20) hala eskatuz gero, betiere datu pertsonalen babesari buruz indarrean dagoen legeria urratzen ez bada.

Bazkideak aipatutako baldintzetan baliatutako eskubidea Konpromisarioen Batzarrean bertan ezin bada bete, Zuzendaritza-Batzordea behartuta egongo da eskatutako informazioa idatziz ematera, Batzarra amaitu eta hurrengo zazpi egun naturalen barruan.

Hirugarrena: Estatutuetako 13.2.q) artikuluan ezarritakoarekin bat etorriz, bazkideek, konpromisario izan ez arren, Gai-zerrendarekin lotutako galderak egin ahal izango dituzte. Eskubide hori Klubari zuzendutako jakinarazpen baten bidez edo Klubaren webguneko Bazkideen Txokoan horretarako ezarritako atalaren bidez baliatu ahal izango da, Batzarra egiteko data baino hamabost egun lehenagora arte (2026ko urriaren 13ra arte). Eskubide hori baliatzeari emandako erantzuna aurreko atalean xedatutakoaren araberakoa izango da.

Laugarrena: Gai-zerrendako Laugarren puntuaren ondorioetarako, bazkideen eskura daude Klubaren webguneko Bazkideen Txokoan (www.athletic-club.eus) eta Bazkideen Arreta Bulegoan Estatutu-araudia eta osaera berrituko zaien organo bakoitzeko kideak izendatzeko prozedura. Organo horietako kide izateko hautagai gisa aurkeztu nahi duten bazkideek 2026ko urriaren 15eko 12:00ak arte aurkeztu ahal izango dute hautagaitza. Bete beharreko dokumentazioa Klubaren webguneko Bazkideen Txokoan (www.athletic-club.eus) eta Bazkideen Arreta Bulegoan dago eskuragarri.

Hauteskunde-Batzordeari dagokionez, Batzarrak izendatuko ditu Batzarrean bertan egingo den bozketan aterako diren hiru kide titularrak eta hiru ordezkoak, bai eta Batzarraren aurreko astean notarioaren aurrean egingo diren zozketetatik aterako diren bi kide titularrak eta bi ordezkoak ere, Estatutuen 72.1 artikuluarekin bat etorriz. Bozketa egiteko, gehienez ere hiru izen izendatuko dira dagokion zerrendan dauden hautagaien artean, aipatutako prozeduraren arabera.

Diziplina-Batzordeko bost kide titularren eta bost ordezkoen hautaketarako bozketa egiteko, gehienez ere bost izen izendatuko dira aipatutako prozeduraren arabera zerrendan sartu direnen artetik.

Apelazio-batzordeko bost kide titularren eta bost ordezkoen hautaketarako bozketa egiteko, gehienez ere bost izen izendatuko dira dagokion zerrendan dauden hautagaien artean, aipatutako prozeduraren arabera.

Azkenik, Kontrol, Gardentasun eta Gobernu Onaren Batzordeko hiru kide titularrak eta hiru ordezkoak izendatuko ditu Batzarrak, Estatutuen 60. artikuluan aurreikusitakoaren arabera. Bozketa egiteko, gehienez ere hiru izen izendatuko dira dagokion zerrendan dauden hautagaien artean, izendapen-prozeduraren arabera. Izendapen hori eskuragarri dago Klubaren webguneko Bazkideen Txokoan (www.athletic-club.eus) eta Bazkideen Arreta Bulegoan.

Aurreko lau kasuetako batean ere ezin izango dira izendatu aldez aurretik edo Batzarrean bertan, Klubeko beste edozein organo independentetan titular edo ordezko gisa aritzeko izendatuak izan diren pertsonak.

Bosgarrena: Gai-zerrendako bosgarren puntuaren ondorioetarako, Batzarreko kideen ehuneko hamar (%10) edo bazkide osoen ehuneko bi (%2) ordezkatzen duten konpromisarioek Zuzendaritza-Batzordearen ekimenez adostutako deialdiaren osagarria argitaratzeko eskatu ahal izango dute, hasierako Gai-zerrendari puntu bat edo gehiago gehituta. Zabaltzeko eskaera Estatutuen 23.3 eta Erregelamendu Organikoaren 15.3 artikuluen arabera egin beharko da. Proposamena Estatutuen 18. artikuluan zerrendatutako gaiei buruzkoa izango da, eta eskatzaileak Klubarentzat duen interesa justifikatu beharko du, arrazoiak emanez (Erregelamendu Organikoaren 15.3 artikulua). Eskubide hori Klubari zuzendutako jakinarazpenaren bidez edo Klubaren webguneko Bazkideen Txokoan gaitutako atalaren bidez baliatu ahal izango da, non Estatutuek eskatzen dituzten atxikipenak ere egin ahal izango diren.

Seigarrena: Konpromisarioen Batzarra, osorik edo zati batean, Osoko Batzar bihurtu ahal izango da, zenbait gai bertara helaraziz, gai horiek bozkatzeko, Estatutuetako 23.2 artikuluan aurreikusitako baldintzetan. Eskubide hori Batzarra hasi aurretik baliatu ahal izango da, Klubari zuzendutako jakinarazpenaren bidez edo Klubaren webguneko Bazkideen Txokoan gaitutako atalaren bidez; bertan, Estatutuek eskatzen dituzten atxikimenduak ere egin ahal izango dira.

Zazpigarrena: Bazkide konpromisarioak honela bertaratu daitezke Batzarrera:

• Urrutitik bertaratzea: bertaratzen diren pertsonen nortasuna eta haien bazkide-eskubideen erabilera egokia bermatzeko, Batzarrera urrutitik, telematikoki, bertaratu nahi duten konpromisarioek aldez aurretik eman beharko dute izena Klubaren webguneko Bazkideen Txokoan edo Bazkideen Arreta Bulegoan, 2026ko urriaren 19ko 12:00ak baino lehen. Ezarritako epea amaitu ondoren, ez da beste izen-ematerik onartuko Batzarrera telematikoki bertaratzeko eta botoa emateko eskubidea baliatzeko. Izena eman ondoren, konpromisarioak erabiltzaile/gakoaren kredentzialak edo antzekoak jasoko ditu Batzarra egin aurretik, bere helbide elektronikoan. Era berean, izena eman ondoren, ezin izango da aurrez aurreko bozketarik egin. Batzarrera urrutitik, telematikoki, bertaratzeko izena emateak berariazko eta atzeraezinezko uko egitea ekarriko du aurrez aurre botoa emateko eskubideari.
   
• Aurrez aurreko bertaratzea: Batzarrera telematikoki bertaratzeko eta botoa emateko izena eman ez duten bazkide konpromisarioak Batzarrera aurrez aurre bertaratu eta botoa eman ahal izango dute.

Ohiko Batzar Nagusira joateko bertaratze-txartel elektronikoa Klubaren erregistroetan jasota dagoen helbide elektronikora bidaliko zaie. Era berean, Klubaren webguneko Bazkideen Txokoan horretarako gaituko den atalean deskargatu ahal izango dute, edo Bazkideen Arreta Bulegoan eskatu ahal izango dute.

Batzarra egingo den esparrura sartzeko eta beren bazkide-eskubideak baliatzeko, bertaratze-txartel elektronikoa aurkeztu eta NANaren, pasaportearen, gidabaimenaren edo Bazkidearen Egiaztagiri Elektronikoaren bitartez identifikatu beharko dute.

Zortzigarrena: Estatutuetako 28. artikuluan ezarritakoarekin bat etorriz, Konpromisarioen Batzarra baliozkotasunez eratuta geratuko da, lehen deialdian, bere kideen gutxienez %50 bertaratzen badira, aurrez aurre zein urrutitik, bitarteko telematikoen bidez. Bigarren deialdian, nahikoa izango da kideen %20 bertaratzea.

Bederatzigarrena: Batzarrera urrutitik, telematikoki, bertaratzea aukeratzen duten bazkide konpromisarioek Batzarrean parte hartu ahal izango dute, halaber, Batzarra jarraitu ahal izango duten plataforma telematikoan gaitutako txat-aren bidez; ez da beharrezkoa izango Klubari aldez aurretik inolako jakinarazpenik egitea. Urrutitik bertaratzeko izena eman duten bazkideek hitz egiteko txanda eskatu eta Batzarra egiten ari den bitartean parte hartu ahal izango dute, galdera idatziak egiteko, plataforma telematiko berean gaitutako txat-sistemaren bidez.

Hamargarrena: Estatutuetako 31.5 artikuluan ezarritakoarekin bat etorriz, bozketa Gai-zerrendako puntu bakoitzari buruzko esku-hartze guztiak amaitu ondoren egingo da. Batzarraren garapena arintzeko, Gai-zerrendako hainbat punturi dagozkien bozketak bateratu ahal izango dira. Kasu horretan, puntu guztiak banan-banan azalduko dira, esku-hartze guztiak egingo dira eta bozketa-epe bat irekiko da. Aldi horretan, puntu bakoitza bata bestearen ondoren eta modu independentean bozkatuko dira.

Bozketa isilpekoa izango da beti, bai aurrez aurrekoa, bai urrutitik (telematikoki). Ahal dela, botoa emateko, Klubak gailu interaktiboak emango dizkie bertaratzen diren konpromisarioei, botoak hautestontzietan sartzeko sistema tradizionalaren ordez (bi sistemak baliozkoak izango dira). Bertaratzen diren konpromisario guztiek sistema berari jarraituz bozkatuko dute.

Gailu interaktiboen bidezko bozketa aukeratuz gero, aurrez aurre bertaratzen diren konpromisarioek nahikoa denbora izango dute Gai-zerrendako puntu bakoitzean botoa emateko. Bozkatzeko eskubidea urrutitik, telematikoki, baliatzen duten konpromisarioei bozkatzeko epe luzeagoa emango zaie.
Hamaikagarrena: Gai-zerrendako Lehenengo, Bigarren eta Hirugarren puntuei dagozkien erabakiak onartzeko, gehiengo soila beharko da; gehiengo soila dagoela ulertuko da aldeko botoak kontrako botoak baino gehiago direnean. Ondorio horietarako, boto baliogabeak, boto zuriak eta abstentzioak ez dira zenbatuko.

Hamabigarrena: Jakinarazten da Konpromisarioen Batzarraren zuzendaritzak beharrezko neurriak hartuko dituela saioaren garapena arintzeko eta saioa gehiegizko ordu berantiarrean amaitzea saihesteko. Horretarako, Batzarra lehen deialdian 18:00etan hasiko da. Era berean, Batzarraren zuzendaritzak parte-hartzaileei (bai Zuzendaritza-Batzordeko kideei, bai konpromisarioei) eskatuko die eztabaidagai den gaira mugatu daitezela eta beren jarrerak ahalik eta zehaztasun eta sintesi handienarekin azal ditzatela. Konpromisario bakoitzaren lehen esku-hartzearen iraupena saioaren hasieran ezarriko da.

Hamahirugarrena: Konpromisarioei gogorarazten zaie beren identifikazio-datuak Klubaren webguneko Bazkideen Txokoan (www.athletic-club.eus) eguneratuta izatearen garrantzia, Klubak bazkide-eskubideak baliatzeko behar dituzten baliabideak eskaini diezazkien.

Hamalaugarrena: Estatutuetako 19.10 artikuluan ezarritakoarekin bat etorriz, bazkide konpromisarioek beren karguari uko egin ahal izango diote. Era berean, konpromisario izaera galduko dute bi batzarrera behar bezala egiaztatutako justifikazio nahikorik gabe bertaratzen ez badira. Izaera hori galtzea, diziplina-izaerarik ez duena, Hauteskunde-Batzordeak erabakiko du interesdunari entzun ondoren, eta kargu horretan aritzea eragotziko du hurrengo bost urteetan.

Bilbon, 2026ko irailaren 27ean.

Presidentea: Jon Uriarte Uranga Jn    Idazkaria: Jon Salinas Aguirre Jn