Madrid CFF-Athletic Club, hirugarren postua lortzeko dema

Larunbat honetan, 18:00etan, Athleticek Madrid CFF izango du aurkari Fuenlabradako Fernando Torres futbol zelaian, Liga F-ko 6. jardunaldian. Neurketa honek, denboraldiko honetako selekzioen lehen geldialdiaren aurretik, sailkapeneko hirugarren postua erabakitzeko balioko du. Madrildarrek, hirugarrenak 12 punturekin, 4 garaipen eta porrot bat lortu dituzte denboraldi honetan, eta Athletic Clubek, laugarrenak 10 punturekin, hiru garaipeneko, berdinketa bateko eta porrot bateko errekorra du.

Liga F-ko seigarren jardunaldi honetan, lehoiek Atletico Madrilen aurka garaipen bikaina lortu izanaren bultzada izango dute lagungarri. Dena den, futbolak ez du iraganik ezagutzen, eta etorkizun hurbilean jarri behar da arreta. Madrildarrak beti dira aurkari zaila eta aurten maila oso altuan ari dira, beraz, beste hiru puntu lortzeko erronka ez da batere erraza izango.

Talde madrildarrak denboraldiko lehen hiru jardunaldietan hiru garaipen jarraian lortu ondoren helduko da larunbateko hitzordura. Ondoren, RCD Espanyolen aurka galdu zuten etxetik kanpo (5-1), baina Alavesen aurka jokatutako azken partidan berriro garaipenaren zaporea dastatu zuten (1-0), hiru puntu lortzeko eta Athletic Clubek eskuratu nahi duen hirugarren postua ez galtzeko.

Agote eta Gurtubay, protagonistak zuri-gorriek Fuenlabradan erdietsitako azken garaipenean

Azken bost denboraldietan, Fuenlabradarako irteera deserosoa izan da zuri-gorrientzat. Nahiz eta iaz emaitza bikaina lortu (0-2) Agote eta Gurtubayren golei esker, biak 20 urtez azpiko Munduko Txapeldun izendatu berriak, azken bost bisiten balantzea oso parekatuta dago bi taldeen artean: bi garaipen Madril CFF-rentzat (2023-24 eta 2022-2023 denboraldietan), bi garaipen Athleticentzat (2025-26 eta 2021-2022 denboraldietan) eta berdinketa bat (2024-2025 denboraldian).

Ikusiko dugu ea Victor Martinek zuzentzen duen taldea azken jardunaldian erakutsitako irudi onari jarraipena emateko gai den eta bigarren garaipena jarraian lor dezakeen. Taldearen sasoi bikaina berretsiko luke lehiaketa bi astez gelditu aurretik.