Real Betis Féminas - Athletic Club

Athletic Clubek 4-2 galdu zuen Luis del Sol Kirol Hirian eta etxetik kanpo egindako lan ona moztuta ikusi du Lezamatik urrun lehen porrota jaso ostean. Real Betisek 4-0ekoa lortu zuen lehen zatian, baina bigarrenean Gimberten eta Valdezateren golei esker partidan sartzen saiatu ziren lehoiak.

Hirugarren minutuan Asantewaak aurretik jarri zituen betikoak, norgehiagoka hasi baino egin ez zuenean. Lehoiak zelaira egokitzen saiatzen ziren, eta lehenbailehen partidan sartzen, baina bigarren kolpea laster iritsiko zen. Mari Paz Vilasek, Medinaren alboko erdiraketa aprobetxatuz, 2-0ekoa jarri zuen. Galiziako aurrelariak 3-0ekoa eta 4-0ekoa berdin-berdin sinatu zituen 28. eta 34. minutuetan, kornerretik bigarren zutoinean bi erdiraketa errematatuz. Zuri-gorrien nahasmena erabatekoa zen jasotako gol zaparradaren aurrean. Geldikako jokaldiren bat ozta-ozta atera zuen Thalmann suitzarrak atepean. Iraia Iturregiren neskek oso egoera zaila zuten aurrean Luis del Solen puntuak lortzeko.

Bigarren zatian, gidoia ez zen gehiegi aldatu, baina lehoiek geldikako jokaldian egin zuten gola, Vanesa Gimberten golari esker, Eunate Arraizak 60. minutuan egindako erdiraketa aprobetxatuz. Lehoiak pixkanaka hazten hasi ziren, eta Amorosen taldea izutu zuten. Lehoien fedea handitzen joan zen eta 65. minutuan Valdezatek sareratu zuen Itxasok erdiratutako baloi bat markagailuan 4-2koa jartzeko. Athleticek geldikako jokaldietan min egiten zuen eta beste bat sartzen saiatzen zen, aurkariari zalantzak sortzeko. Norgehiagoka amaitzeko, zuri-gorriek markagailua iraultzeko aukera izan zuten, baina azkenean ez zen iritsi. Horrela, Iturregiren neskek, zortzi jardunaldi jokatu ondoren, etxetik kanpoko bolada zapuztu zuten.