Laredoren aurka lidergoa berreskuratzera

Bilbao Athleticek bolada onari eutsi dio, urriaren 25etik porrotik jaso gabe daramatzate Joseba Etxeberriaren mutilek. CD Laredoren aurka jokatuko du gaur arratsaldean, 16:30etik aurrera, Bigarren B Mailako 19. jardunaldiko norgehiagokan. Partida gure Youtubeko kanal ofizialetik jarraitu ahal izango da.

Galdu gabeko hamahiru neurketa pilatzeaz gain, Portugalete (2-0), SD Amorebieta (2-3) eta Deportivo Alaves (0-2) gainditu dituzte azken hiru partidatan. Aurkariek jokatutako norgehiagoka kopuruaren ondorioz lidergoa galdu duen arren, Bilbao Athleticek (30) bi puntura du Real Union (32) partida bat gutxiagorekin eta puntu batera Urritxeko taldea (31), haiek baino bi partida gutxiago jokatuta.

Aurkaria zazpigarren dago sailkapenean hemezortzi punturekin eta badaki zer den filialari gauzak zailtzea: joaneko partidan emaitza binakoa izan zen San Lorenzon. Jasok eta Williamsek, penaltiz, sartutako golei esker, zuri-gorriek aurrea hartu zuten arren, Alvarok lehen zatiaren bukaeran eta Roberto Canok luzapenean penaltiz sartutako golek, markagailua parekatu zuten.

Gaurko partidaz gain, talde zuri-gorriak Barakaldo, datorren asteburuan, eta Real Union (lehen faseko azken partidan) bera bisitatu beharko ditu eta Lezaman Realaren filialaren kontra arituko da Lezaman martxoaren 21eko asteburuan eta Leioaren aurka jokatu beharko du Covidaren ondorioz atzeratutako 17. jardunaldiko partidan.