125. urteurrenari hasiera emateko, %100eko Athletic ekitaldia

Athletic Clubek 2023an ospatuko du 125. urteurrena. Aparteko zifra batetik haratago doan ospakizuna da, eta nortasuna, kidetasuna eta eliteko futbola ulertzeko modu paregabea ere ospatzen ditu. Abenduaren 29an, osteguna, arratsaldeko 17:00etatik aurrera, Katedralak ateak irekiko dizkie zaleei 125. urteurrenaren hasiera ospatzeko, Klubak historian zehar mantentzen jakin duen eta belaunaldiz belaunaldi ondare preziatu gisa transmititu den esentzia zuri-gorri hori islatzen duen ekitaldi batekin.

Arratsalde biribila: 'San Mames, kantuz'

San Mamesera sarrera doakoa eta irekia izango da athleticzale guztientzat 17:00etatik aurrera. Aldez aurretik ez da erreserbarik egin beharko, eta jendea, bertaratzearen arabera, adieraziko zaien harmailetan jarriko da (egun gutxi barru, dagokion informazio guztia emango da). Ekitaldia 17:30ean hasiko da, euskal gizartean errotuen dagoen jai mota batekin: kantuz ospatzea, familian eta komunitatean ospatzea. Horretarako, Klubak hamasei abestiz osatutako liburuxka bat banatuko du taldean abesteko. 'San Mames, kantuz' saioak zeremonia maisu bat izango du, eszenatoki txiki batetik hainbat gonbidaturi bidea emango diena, ikusleei beren interpretazioan gida diezaieten. Bilboko Koral Elkarteak zuzenduko ditu lehenengo lau abestiak, horien artean, bi gabon-kanta klasiko: “Olentzero” eta “Hator, hator”. Taberna Ibiltaria taldeak hartuko du Abesbatzaren lekukoa, Lau teilatu eta euskal musikaren beste klasiko batzuk abesteko. Ondoren, bilbainada tradizionalen txanda izango da eta, amaitzeko, Herri Harmailaren ordezkaritza bat igoko da eszenatokira jendea San Mameseko ohiko abestiak abestera animatzeko, hala nola, “Ene maite” eta “Txoria txori”. Arratsalde osoan zehar, estadioko edaritegiak irekita egongo dira eta ohiko edariak eta garagardoa erosi ahal izango dira.

Ekitaldi nagusia, bandera igotzea Bilboko Koral Elkartearen eskutik

Jardunaldiaren ekitaldi enblematikoa, arratsaldeko 18:45ak aldera, 125 urte hauetan zehar Athletic sentimendua zabaltzen lagundu duten pertsona guztiei omenaldia izango da. Bilboko Koral Elkarteak “Agur Jaunak eta Andreak” abesten duen bitartean, San Mameseko 125. urteurreneko bandera ofiziala, 2023 osoan zehar mantenduko dena, utzi zigutenen, baina beti egoten gure ondoan daudenen omenez igoko da. 

LaLiga-ko Real Betis-Athletic Club partida ikusgai DAZN-i esker

19:15etik aurrera, zale zuri-gorriek Sevillan Real Betisen aurka jokatuko duten partida ikusi ahal izango dute zelai gainean kokatutako pantaila erraldoien bidez. Athletic Cluben 125. urteurrenaren inaugurazio ekitaldiarekin bat egin duen DAZN-i esker posible izango da hau.

Athleticez harro egoteko urtea

Abenduaren 29ko inaugurazio ekitaldi honen aurkezpenarekin, Athletic Clubeko esparru garrantzitsu guztiak biltzen dituen ospakizun urtea hasiko da. Kirol, gizarte, kultura eta erakunde ekitaldi nabarmenez osatutako programa honek Athleticen idiosinkrasia paregabea proiektatuko du San Mamesetik munduko txoko guztietara. Ospakizun-agenda pixkanaka azalduko da, programatutako ekintzak hurbildu ahala, eta familia zuri-gorria bere klubaz harro sentiaraziko du.