De Marcosek urte batez luzatu du kontratua

Oscar de Marcosek 2024ra arte jokatuko du Athletic Cluben eta hortaz, bere hamabosgarren denboraldia beteko du kamiseta zuri-gorria defendatzen, 2009an bere bihotzeko taldeak fitxatu zuenetik.

Aurreko urteetan gertatu den bezala, bere jarraipenari buruzko erabakia denboraldi amaieran hartu du Guardiako atzelariak, bere jarduna, egoera fisikoa eta aldartea baloratu ondoren. Oraingoan ere, etete klausularik gabe sinatu du. 
 

Beste urte bat zurekin, Demar, urtebete baino gehiago da.

Askoz gehiago.#DeMarcos2024 #AthleticClub 🦁 pic.twitter.com/34jQ06b3oy

— Athletic Club (@athletic_eus) May 23, 2023

Zenbakiak hor daude. Aurten 40 partida eta 3.000 minutu baino gehiago jokatu ditu, aurreko denboraldian baino gehiago oraindik. Defentsan duen erregulartasunak eta erasoko ekarpen etengabeek eztabaidaezina bihurtu dute Ernesto Valverderen hamaikakoetan. Izan ere, Nico Williamsek bakarrik gainditzen du minutu gehiago jokatuta. De Marcos, gainera, Nicorekin berdinduta dago asistentziei dagokienez, seirekin, eta aurtengo denboraldian bi gol sartu ditu.

RC Celtaren aurka, Oscar de Marcosek bere 496. partida jokatu zuen Athleticen eta Piru Gainzarekin berdindu zuen ranking historikoan. Egungo taldean, Iker Muniainek bakarrik gainditzen du sailkapen horretan. Superkopako bi titulu, Kopako lau final, Europa Ligako beste bat eta Europan lehiatzeko lortu dituen zazpi sailkapenek Klubaren historia modernoko urrezko hamarkadetako baten ordezkari leial gisa goraipatu dute De Marcos. 

Futbolari arabarraren kirol-ibilbidea bikaina bada, ez da gutxiago gizarte arloan erakutsi duen erantzukizuna. Taldekideek eta zaleek partekatzen duten pertenentzia-zentzuaren transmisio-katean, Oscar de Marcos katebegi erabakigarria da. Modu ezin hobean ordezkatzen du Athleticen nortasuna, munduan bakarra, eta hala aitortzen dute bazkideek eta zale zuri-gorriek.