"Igoerak lasaitu egin gaitu, baina ez da Klubaren helburu nagusia"

Beñat Gerenabarrenak, Bilbao Athleticeko kapitainak, eta Mikel Jauregizarrek, Ernesto Valverderen aginduetara lau partida jokatu dituen bigarren taldeko futbolariak, Carlos Gurpeguik zuzentzen duen taldearen zein banakakoen arrakasta aztertu dute. Iker Muniain gure kapitain handiarentzat erreleboa dago Lezaman, bai mezu aldetik zein futbolari dagokionez ere. Horrela mintzatu dira harrobiko bi jokalariak La Txantreakoak bere erabakiaren berri eman baino ordubete lehenago.

"Igoerak lasaitu egin gaitu, baina ez da Klubaren helburu nagusia. Urte hauetan ikusi da Lezamako jokalariok goian laguntzeko prest gaudela, hor daude Prados, Paredes, Adu Ares, Unai Gómez, Jauregizar, Egiluz... ", adierazi du Gerenabarrenak. Erdilariak nabarmendu du ere igoeraren lorpena ez dela erraza izan, batez ere "nahi ez genuen denboraldiaurre baten ondoren".

Lekeitiarrak adierazi duenez, "erraza dirudi egin dugunak, baina lan handia dago teknikarien eta jokalarien atzetik. Oso harro gaude lortutakoaz, eta gogotsu datorren urteari begira. Primera Federacion mailan eman genituen bi urteak zailak izan ziren, baina porrotetatik ikasten da gehien. Anbizio handiko taldea da, kalitatezkoa, eta lanean eman ditugun hiru urteei esker lortu dugu hau. Konfiantza berreskuratzeko urtea izan da".

 

Bestalde, Jauregizarrek nabarmendu du Zubietan "urte osoan bezala, txartel gorriak suposatu zuen erronkaren aurrean hazi egin ginen". Ez du burua galdu bigarren taldetik lehen taldera egin dituen igoera eta jaitsierekin: "Beti jakin izan dut zein den nire lekua, Bilbao Athletic, bestea saria izan da. Jokalariek asko lagundu didate, bai eta staff-ak, eta noski, aitak eta amak oinak lurrean edukitzeko funtsezkoak izan dira". 

Ez du inoiz ahaztuko aurtengo denboraldia, are gutxiago aurpegian malkoak zituenean Iñaki Williamsek Kopan FC Bartzelonaren aurka sartutako golaren ondoren, bera izan baitzen jokaldi garrantzitsua hasteko baloia lapurtu zuena: "Bilbao Athleticekin denboraldiaurrea egitera etorri nintzen Basconiatik, ea geratzen nintzen, mailaz igo gara, Kopa irabazi dugu... Eguneroko lanak emandako fruituak dira", esan du bermeotarrak. "Gurpe eta Ander (Murillo) lagunak bezalakoak dira, oso gertukoak", adierazi du.