Athleticek Txapeldunen Ligako sekulako itzulera izango du

Athletic Clubek dagoeneko ezagutzen ditu Txapeldunen Ligako Faseko zortzi aurkariak, eta ilusio handiz itzuliko ekingo dio txapelketari 11 urte luzez jokatu gabe egon ostean. Eta itzulera sekulakoa izango da, zorabiozko egutegi hunkigarri batekin. Partiden ordenaren eta ordutegien berri izan gabe, lehoiek PSG txapelduna, Arsenal, Sporting Portugal eta Qarabag hartuko dituzte San Mamesen. Kanpoan, zalentzako bisita erakargarriak izango dira Borussia Dortmund eta Newcastlen aurkako norgehiagokak eta zailak oso Atalanta erasokorraren eta Pragako Slaviaren aurka. Egutegi osoa larunbatean jakinaraziko da. Lehen jardunaldia irailaren 16a (asteartea) eta 18a (osteguna) bitartean jokatuko da.

Monakoko Grimaldi Foroan egindako zozketan, Nerea Ortiz presidenteordea izan da zuri-gorrien ordezkari nagusia, eta zoriak norgehiagoka gogorrak ezarri ditu, lehiaketa den tankerakoak, alegia. "San Mamesera gau handiak itzuliko dira. Dortmundera irteera bikaina dugu, Europara itzuli gara eta etxean partida itzelak jokatuko ditugu, txapeldunaren aurka, PSGren aurka; baita Arsenalen aurka ere, Sporting Portugal jasoko dugu... Eta bidai luzea ere saihestu dugu (Qarabagi bisita). Txapeldunen Liga oso lehiakorra da, oso konplexua delako", adierazi du Nerea Ortizek.

Bestalde, Daniel Vivianek, Bilbotik, honako iritzia eman du Athletic Clubek txapelketa kontinental nagusira itzuliko den edizio honetako aurkariei buruz: "Zozketa konplexua izan da, baina ilusio handiko partidak ditugu etxean, aurkari handien aurka. Ezeren beldurrik gabe, ilusioz, anbizioz ekingo diegu norgehiagokei". Gogoa eta ausardia soberan duelarik, "helburua neurketa bakoitzean gu geu izatea izango da, anbizio handienarekin irtetea, urratsez urrats ikusiko dugu noraino irits gaitezkeen. Ilusio berezia egiten didate etxeko partida guztiek, gau horiek gure jendearekin bizi ahal izateak. Lagundu egingo digute", aitortu du.

Athleticek San Mamesen neurtuko ditu indarrak Luis Enriqueren PSGren, Mikel Artetaren Arsenalen eta Portugalgo txapelduna den Sporting CP-ren aurka. Azerbaijango Qarabag da beste aurkaria.

Etxetik kanpo, Dortmundeko Signal Iduna Parkaren bisita erakargarria izango da, baita Newcastlerena ere, UEFAko kanporaketa baten ondorioz adiskidetasun handia sortu baitzen bi taldeen zaleen artean. Atalanta, duela bi denboraldi Europa League txapelketa irabazi zuena, eta Slavia Praha, iaz San Mamesen garaitzeko gogotik sufritu genuen aurkaria, izango dira beste anfitrioiak.

36 taldeetako multzoko lehen zortzi sailkatuak zuzenean igaroko dira final-zortzirenetara, kanporaketako bigarren neurketa etxean jokatzeko abantailarekin. Hurrengo 16ak, berriz, kanporaketa gehigarri bat jokatuko dute, txapelketan aurrera jarraitu eta lehen zortzi sailkatuetako taldeen aurka kanporaketekin jarraitzeko. Azken 12ak Europatik kanpo geratuko dira denboraldi amaierarako. Finala Budapesten jokatuko da maiatzaren 30ean.

Zortzi jardunaldien datak honako hauek dira:

• Lehen jardunaldia: irailaren 16, 17 eta 18an
• Bigarren jardunaldia:  irailaren 30ean edo urriaren 1ean 
• Hirugarren jardunaldia: urriaren 21 edo 22an
• Laugarren jardunaldia: azaroaren 4 edo 5ean
• Bosgarren jardunaldia: azaroaren 25 edo 26an
• Seigarren jardunaldia: abenduaren 9 edo 10ean
• Zazpigarren jardunaldia: urtarrilaren 20 edo 21ean
• Zortzigarren jardunaldia: urtarrilaren 28an

Ligako Fasea ikusteko bonoak, hemen.