Valverdek Athleticen duen mitoa handitu du: 500 partida agintean

Ernesto Valverdek, Athleticeko entrenatzaile ospetsuak, bere 500. partida ofiziala zuzenduko du Athleticeko entrenatzaile gisa larunbat honetan Mendizorrotzan Deportivo Alavesen aurka. Zuri-gorrien aulkian partida gehien zuzendu dituen entrenatzaileak arrastoa handitzen jarraitzen du Klubaren historian, eta denboraldia amaitzean agur esango dio.

Bere atzetik, partida gehien zuzendu dituzten entrenatzaileak Javier Clemente (289), Juan Urquizu (235) eta Joaquin Caparros (187) dira.

Larunbatean Alavesen aurka jokatuko den partida kontuan hartuz, Valverdek Ligako 376 partida, Errege Kopako 56, Europa Ligako 48, Champions Leagueko 16 eta Superkopako 4 zuzendu ditu Athleticen, eta orain arte 229 garaipen, 157 porrot eta 113 berdinketa lortu ditu.

Taldearen buru izan den hamarkada honetan, Valverdek kirol arrakastaz beteriko ibilbidea burutu du, horien artean bi titulu nabarmentzen direlarik: 2015/16ko Superkopa eta 2023/24ko Kopa, 40 urteren ondoren Athleticzale familiak La Gabarra berriro atera ahal izatea ahalbidetu zuena.

Gainera, denboraldia amaitzear den honetan, 'Txingurri'-k zazpi aldiz sailkatu du Athletic Europara: bitan Champions Leaguerako eta bostetan Europa Leaguerako, aurreko denboraldian finalerdietara iritsita.

Entrenatzaile gisa egindako ibilbide zoragarri horri jokalari garaia gehitu behar zaio: 1990etik 1996ra bitartean, sei denboraldi horietan 188 partida jokatu eta 50 gol sartu zituen.

Hiru etapa Athleticen buruan

Ernesto Valverdek Athletic Cluben entrenatzaile gisa eman duen ibilbidea hiru etapatan egituratzen da, eta horrek erakundearen azken urteotako historiaren zati handi bat azaltzen du. Erregulartasunak, kirol-arrakastak eta zaleekiko lotura bereziak, Athleticen irudi nagusi bihurtu dute gasteiztar teknikaria hiru ziklotan zehar.

Lehen etapan, 2003 eta 2005 artean, Valverdek taldea UEFA Koparako sailkatzea lortu zuen, Ligako bosgarren postuan 57 punturekin geratu ondoren. Teknikari gisa egindako bigarren etapan (2013-17), Athleticek bigarren Superkopa irabaztea lortu zuen, titulurik gabeko lehorteari amaiera emanez 31 urteren ostean, eta taldea Champions Leaguera sailkatu zuen 15 urte geroago. Gainera, Athletic Katedral zaharrean (2013an agurtu zuten) zein San Mames berrian zuzendu duen entrenatzaile bakarra izan da. 

Azkenik, 2022an, lehoien aulkira itzuli zen, taldearen buru izateko hirugarren etapari ekiteko eta Kopa altxatzeko, 40 urteko itxaronaldiaren ondoren, Gabarra gainean Nerbioi Itsasadarrean zehar ospakizun historiko bat eginez. Gainera, Athletic Europara eraman zuen berriz sei urteren ostean, eta Europa Leagueko finalerdietara iritsi eta Champions Leaguera ere sailkatu zuen taldea.

Joan den martxoaren 20an, entrenatzaile gasteiztarrak Kluba utziko zuela iragarri zuen denboraldia amaitzean, eta, beraz, Real Madrid taldearen aurka Santiago Bernabeun jokatuko den partida izango da zuzenduko duen azkena.