Yeray Alvarez: “Inoiz baino gogo handiagoa dut jokatzen jarraitzeko”

Yeray Alvarez Athleticeko erdiko atzelaria hedabideen aurrean agertu da, Athleticen beste bi denboraldirako kontratua luzatuko duela iragarri ostean. Barakaldokoak 2028ra arte berritzeagatik “oso pozik” dagoela onartu du: “Hamar hilabete taldetik urrun egon ondoren oso albiste garrantzitsua eta ona da niretzat. Orain disfrutatzea besterik ez dut buruan, hona entrenatzera etortzea eta jokatzea. Nire ametsa ibilbidea Athleticen amaitzea da”.

Yerayk bere zigorraren ondorioz taldearen dinamikatik kanpo egon den hamar hilabeteak “luzeak” izan direla onartu du, baina denbora honetan jaso duen babesa eskertu du. “Nire lankideak, Klubeko langileak, familia eta lagunak, egunero egon dira ni animatzen eta jokatzeko eta berriz gozatzeko denbora geratzen zela gogorarazten. Denborak aurrera egin ahala, indartsu ikusi dut neure burua, kementsu, eta orain inoiz baino gogo handiagoa dut lanean jarraitzeko eta jokatzen jarraitzeko”, adierazi du.

Denboraldia amaitzeko lau partida besterik falta ez diren honetan, taldeak Europara itzultzeko duen aukeraz hausnartu du erdiko atzelariak: "Alaves eta Osasuna taldeei irabazi aurretik genuen pentsamolde bera dugu. Puntu hauek lasaitasun puntu bat ematen dute eta partidu horietan izaten genuen urduritasun apur bat gutxiago dugu, baina pentsamoldea partidak irabaztea izaten jarraitzen du, Valentziatik hasita. Kontziente gara bi garaipen jarraian kateatzeak hor goian kokatuko gintuzkeela”.

Ernesto Valverderen joanaz galdetuta, Yerayk zera erantzun du: “Valverde izan zen debuta eginarazi zidan pertsona, zazpi urte daramatzat berarekin batera eta daukadan guztia esker oneko hitzak dira”. Gainera, Edin Terzić hurrengo entrenatzaileari buruz honakoa esan du defentsak: “Badakigu zorrotza izango dela eta gogor lan egingo dugula, baina gogo handia dugu. Dena emango dugu eta besoak zabalik hartuko dugu”.