Lekue, One Club Man baten agurra

Iñigo Lekuek futbol profesionala utziko du Athleticen benetako One Club Man bezala, bere bizitzako taldean hamaika denboraldi eman ondoren. Hala erabaki du deustuarrak, kirol zuzendaritzak bi aldeak lotzen zituen kontratua ez duela berrituko jakinarazita.

Harrobiko jokalaria, Danok Bat taldean hezia Basconia eta Bilbao Athleticera jauzi egin aurretik -Bigarren Mailara igo zen harekin-, bere ibilbidean zehar bere balioaniztasunagatik eta konpromisoagatik nabarmendu da, betiere taldearen zerbitzura.

LaLiga amaitzeko hiru jardunaldi falta direnean, Lekuek elastiko zuri-gorria jantzi du 281 partida ofizialetan (18 neurketa partida honetan), 3 titulu irabaziz: 2023/24ko Kopa eta 2014/15 eta 2019/20 denboraldietako Superkopak.
 

Mende honetako hiru titulu zuri-gorrietan garrantzitsua

Hiruretan –mende honetan Klubak lortu dituen 3 titulu bakarrak– lan garrantzitsua bete zuen, partida erabakigarrietan parte hartuz.

Hain zuzen ere, 22 urterekin egin zuen debuta Lekuek, Valverderen aginduetara, 2015eko Superkopako finaleko joaneko partida ahaztezinean (4-0), Bartzelonaren aurka. Behin deustuarra erretiratuta, Laporte eta Iñaki Williams bakarrik geratuko dira denboraldi hartako plantillatik.

2021ean jokatutako Superkopan, Marcelinok bi partidetan zelairatu zuen: Real Madrilen aurkako finalerdiko garaipena (2-1) eta FC Bartzelonaren aurkako finalaren luzapenean lortutako garaipena (3-2). 2024an Real Mallorcaren aurkako Kopako finalean luzapenaren bigarren zatia jokatzeaz gain.
 

Jokalari moldakorra

Ezaugarri jakin batengatik gehiegi nabarmendu gabe, ezaugarrien batuketa batek ahalbidetu du bere bertuterik handiena: moldakortasuna.

Lekue jokalari dinamikoa, azkarra, bertikala, defentsakoa eta erasokorra da, eta edozein postutara egokitzeko gai da, berdin defentsan zein erasoan eta bi hegaletan.

Moldakortasun horrek balio izan dio oso jokalari baliotsua izateko entrenatzaileentzat, eta etengabe jo dute harengana, bai titular gisa (188 partida orain arte), bai aulkitik zelairatuz (93 aldiz). Batez beste, 25 partida jokatu ditu denboraldi bakoitzeko hamaika urtez.
 

Beti funtsezkoa bigarren plano batean

Oso erraza da Iñigo Lekue ezagutzea De Marcosek bere agurrean esan zituen hitzetan, Laguardiako mitoarentzat Athleticena izateak zer esan nahi zuen azaldu zuenean:

“Izotz mendi erraldoi baten punta baino ez da; handiena, gainera… ikusten ez dena da”.

Leialtasuna... fideltasuna... laguntasuna... Beti taldearen zerbitzura jartzea, elkarrekin ibiltzea, elkarren ondoan, zaratarik gabe.
Errespetua, eman eskatu baino lehen, isildu egokitzen denean, eta borrokatu azken hasperenera arte... eta jarraitu”.

Hau guztia Athletic da, eta hau guztia Iñigo Lekue izan da Athleticen, bai berdegunean bai zelaitik kanpo, bigarren planoan ezinbesteko futbolaria, eta horregatik ate handitik joatea merezi duena, berak eskatzen ez badu ere eta deseroso sentitzen bada ere.