Terzićek Geppert, Gaydarov eta De Marcos bere talde teknikora batu ditu

Edin Terzić Athletic Cluben estreinaldirako prestaketekin aurrera egiten ari da. Entrenatzaile zuri-gorri berria Lezaman ari da lanean eta  Sebastian Geppert, Borussia Dortmunden talde-tekinikoko izan zuen kidea, eta Peter Gaydarov, Bayern Munichen beheko mailetan hainbat talde zuzendu dituen entrenatzailea, izango ditu alboan. Bere azken fitxaketa zaleek eta aldagelak gehien miresten duten lehoi ohietako bat da: Oscar de Marcos, Terzićek berak eskatuta, jokalariak garatzeko eta aldagelarekin konektatzeko misio bikoitza egiteko.

Sebastian Geppert (42 urte) alemaniarra izango da analisien arduradun eta laguntzailea. Borussia Dortmunden eman zituen bi denboraldietan bigarren entrenatzaile gisa ere aritu zen. Hamar urtez talde germaniarrean lan egin zuen etenik gabe, zortzi urtez beheko mailetan, non Signal Iduna Parken jokatu zuten futbolarien kopuru handi bat hezi zuen.

Peter Gaydarov (35 urte) teknikari laguntzailea, entrenamenduen arduraduna eta jokalariek Lezaman izango duten trantsizioaren arduraduna izango da. Bayern Munich taldetik dator, bertan 19 urtez azpikoen eta aurtengo denboraldian Youth Leaguean parte hartu duen taldea zuzendu dituelarik. Sei urteko esperientzia bete zuen Bavariako klubean, Nurenbergeko beheko kategorietan lehen aldiz prestakuntza jaso ondoren.

 
De Marcos, teknikariaren berariazko eskaera

16 denboraldiz lehoi gisa aritu den eta hiru titulu eskuratu dituen Oscar de Marcosek, Athletic Cluben partida gehien jokatu dituen bigarren futbolaria da (573), Jose Angel Iribarren atzetik. Gauzak horrela, Edin Terzić staff-erako teknikari laguntzaile egokitzat ikusten du De Marcos, bai jokalarien banakako eta taldeko garapenerako, bai taldearekiko egokitzapen eta konexio prozesuan. 37 urterekin, botak zintzilikatu ondoren, laguntzaile gisa izango duen lehen esperientzia izango da.