Athletic Club-Sevilla FC partidan omenaldi hirukoitza

San Mameseko ligako hasierak Athletic Cluben historiarekin lotutako zazpi futbolariri egingo die omenaldi hirukoitza. Carmelo Cedrun handiaren oroimenean iragarritako minutu bateko isilunearen aurretik, Unai Simon, Aymeric Laporte eta Nico Williams munduko hiru txapeldunak zelairatuko dira. Bere entrenatzailea, Luis de la Fuente lehoi ohia, palkoan hartuko dute. Horrez gain, Elene Gurtubay eta Ziara Vega Bosniako 19 urtez azpiko Europako txapeldunak omenduko dituzte.

Lehoiek, gainera, besoko beltzak eramango dituzte Carmelo gogoan izateko; Athletic Clubeko mitoa eta Klubako Ohorezko Bazkidea. 14 denboraldiz aritu zen merezimendu eta lori handiz talde zuri-gorriaren atea babesten. Liga bat (1955/56), hiru Kopa (1954/55, 1955/56 eta 1957/58) eta Eva Duarte Kopa bat (1950) irabazi zituen. Atezain zuri-gorria izan zen Hamaika Abarkadunen finalean Real Madrid talde ahalguztidunaren aurka eta Manchester Uniteden aurkako elurretako partida gogoangarrian. Carmelo 1962ko Txileko Munduko Txapelketan ere Athleticen ordezkari izan zen, Koldo Etxeberria Klubako taldekidearekin batera.

 

Txileko Munduko Txapelketatik Kanada, Estatu Batuak eta Mexikoko Munduko Txapelketara

Txileko Munduko Txapelketatik 64 urtera, hiru lehoi zuri-gorri -Unai Simon, Aymeric Laporte eta Nico Williams- munduko txapeldun izan dira berriz ere, Luis de la Fuente lehoi ohiaren aginduetara, Kanadan, Estatu Batuetan eta Mexikon jokatutako 2026ko Munduko Txapelketan. Hala, Athletic Cluben izena nazioarteko futbolaren gailurrean kokatu dute.

Mugarri historiko hori jokalarien eta entrenatzailearen banakako meritua da, baina baita haiek sortu zituen eta gaur egun mundu mailako izarrak izateko aukera eman zien Klubarena ere, Athletic Club. Arrazoi hauek guztiak direla eta, datorren abuztuaren 22an Athletic Club–Sevilla FCren atarikoan omenaldia egingo zaie.

Elene Gurtubay eta Ziara Vega, 19 urtez azpiko Europako txapeldunak

Era berean, 26/27 LaLigako lehen partida hasi aurreko ekitaldi instituzionalak ekitaldi xume batekin hasiko dira, Elene Gurtubay eta Ziara Vega Europako 19 urtez azpiko txapeldunak omentzeko. Lezamako harrobiko bi jokalariek, David Aznar entrenatzaile zuri-gorri ohiaren esanetara, nazioarteko bigarren titulua eskuratu zuten, joan den uztailaren 11n Alemaniako selekzioaren aurka jokatutako finalean 19 urtez azpiko Europako txapeldun izan ondoren.