Elene Gurtubayk 2029ra arte berritu du

Athletic Clubek eta Elene Gurtubayek akordioa lortu dute jokalariaren kontratua 2029ko ekainaren 30era arte luzatzeko. Deustuko erdilariak 18 urte ditu,19 urtez azpiko Europako txapeldun izendatu berri da Espainiako selekzioarekin, Bosnian, eta hurrengo hiru denboraldietan Athleticeko jokalari izaten jarraituko du.

Gurtubayk 2025eko abenduaren 7an egin zuen debuta lehen taldearekin eta, ordutik, 21 partida ofizial jokatu ditu eta gol bat sartu du elastiko zuri-gorriarekin. Eliteko lehen denboraldian, F Ligako 18 partidatan, Erreginaren Kopako bitan eta Superkopako batean parte hartu zuen, eta ia 1.000 minutu jokatu zituen.

Lehen taldearen dinamikan sendotzeaz gain, erdilariak Emakumezkoen B taldea Lehen Federaziora igotzen ere lagundu zuen, zortzi norgehiagoka jokatuz eta bi gol sartuz.

CD San Inazion trebatua, 2024ko udan heldu zen Lezamara Bizkerre FT taldetik, Athleticen bigarren taldean sartzeko. Zuri-gorri gisa egin zuen lehen denboraldian 26 partida jokatu zituen eta bost gol sartu zituen Emakumezkoen B taldearekin, eta errendimendu horrek lehen taldearen ateak ireki zizkion Javi Lergaren eskutik.

Nazioartean, Gurtubayk etorkizun handiko futbolari gisa sendotzen jarraitzen du. Uda honetan, bigarren urtez jarraian, 19 urtez azpiko Europako Txapelketa irabazi du Espainiako selekzioarekin, eta paper garrantzitsua jokatu du.

Akordioa Ibaigane Jauregian gauzatu da, eta bertan izan dira Jon Uriarte Athletic Clubeko presidentea eta Xabier Arrieta Emakumezkoen Futboleko zuzendaria.

Sinaduraren ostean, Elene Gurtubay pozik agertu da bere bizitzako klubean hazten jarraitzeko aukeragatik: "Aurrerapauso bat da nire kirol-ibilbidean, eta oso eskertuta nago konfiantzagatik; gainera, oso pozik nago proiektu handi honetan jarraitzeagatik. Nire bizitzako kluba da, eta oso harro nago klub hau ordezkatu ahal izateaz, eta oso berezia da kamiseta hau eraman ahal izatea".