"Denbora luze honen ondoren, oso ondo nagoela esan dezaket"

Dani Vivian taldearekin entrenatzera itzuli da, joan den denboraldian eskuin hankako aduktore luzean zuen lesioagatik geldirik egon ostean. Atzelariak erabat osatuta dagoela adierazi du: "Hilabete askotako lanaren ondoren, oso pozik nago prozesu osoa nola eraman dudan ikusita eta, batez ere, orain taldearekin betiko ilusio berarekin entrenatzen egoteagatik".

Gasteiztarrak errekuperazio-prozesuaz hitz egin du eta positiboki baloratu du: "Klubak programa proposatu zidanetik, ez dut zalantzarik izan; lehen unetik argi izan dut. Bilakaera ona izan da, eta, onena espero nuen arren, ez nuen espero gaur nagoen moduan egotea".

Atzelariak denbora honetan jasotako babesa ere nabarmendu du: "Talde teknikoaren babes osoa izan dut, eta, batez ere, Edin Terzićena. Lehen unetik ulertu ninduen, eta bazekien nola aholkatu, konfiantza eman eta lagundu. Denen aldetik izan dut babes hori". Gainera, denboraldiari aurre egiteko prest dagoela adierazi du: "Entrenatzaileak esaten didanaren esanetara egongo naiz. Lan egin behar dut, neure burua hor ikusi eta prest egon, behar nautenean nire bertsiorik onena emateko".

Denboraldi hasiera honetan taldea nola ikusten duen galdetuta, Vivianek sentipen onak dituela onartu du: "Taldea oso ondo dago, aurretik lantzen genituen antzeko ideiekin lanean ari gara, eta uste dut hori dela gure nortasuna. Partidetan ikusi ahal izan da zer ideia ditugun; horri jarraipena ematea eta lanean ari garen emaitzak lortzen amaitzea besterik ez zaigu falta".