Ourense CF - Athletic Club

Mikel Jauregizarren gol bikain batek, 105. minutuan, luzapenaren lehen zatiko azken jokaldian, Athletic Club Kopako final-zortzirenetan sartu du, O Couton izandako borroka gogor baten ondoren, belar irristakor eta ibilgaitzarekin. Bermeotarrak lokatzetatik atera ditu lehoiak eta hurrengo kanporaketan bigarren mailako aurkari bat izango dute aurrez aurre. Urtarrilean Burgos, Santander, Leon, Albacete, A Coruñara edo Granadara bidaiatuko dute, beti ere azken honek Rayo kanporatzen badu datorren urtarrilaren 6an. 

Erronda honetan Lehen Mailako zenbait talde kanporatu dira, eta Athleticek, ahalegin handiz, arriskua saihestu du.

Berez, Kopako kanporaketa hauek zailtasunaren osagaia badute, talde txikien ilusioak indarrak orekatzen dituelako, O Coutoren soropilak, euriak okerrago bihurtu duena, are gehiago zaildu du neurketa.

Lehen mailako bi talde kanporatu duen Ourense CF, indartsu aritu da aireko jokoan eta ordu erdira arte ez du oinik galdu, Izetaren jarduna urduritasuna sortzen hasi den arte. Aurrelariari gol bat baliogabetu diote eta Guruzetak gora bidalitako beste baloi arriskutsu bat jarri du.

Athleticek estutu du bigarren zatiaren hasieran, baina Padilla agertu da Yusteren jaurtiketa urruntzeko ekintza bakarrean. Guruzetak buruz jo du langan eta Nico Williamsek etxeko atezaina geldiketa on bat egitera behartu du.

Jauregizarren gol bedeinkatuak, Paredesek buruz luzatu duen baloi gelditu batean, etxekoak lur jota utzi ditu, aurpegi eman badute ere. Guruzetak eta Berenguerrek, ekintza berean, 0-2koa izan dute, baina jada ez da beharrezkoa izan.