Levante UD - Athletic Club

Athletic Club Europarako borrokan sartu da Levante UD taldearen aurka garaipen sendoa lortuta (0-2). Robert Navarrok eta Nico Williamsek lehen zatiaren hasieran eta amaieran sartutako golek Valverderen taldea Europarako borrokan mantentzea ahalbidetu dute.

Lehoiek hasieratik min egin dute. Hiru minutu besterik ez dira igaro lehen gola heldu denean: Nicok Berenguerri baloia eman eta honek Robert Navarrori oparitu dio 0-1ekoa sartzeko. Bigarren zatian goleatzaileak sarrera gogor bat jasan du, eta min hartuta zelaia utzi behar izan du.

Athletic oso fin ibili da lehen zatian. 0-2koaz joan da atsedenaldira, baina pixka bat gehiago asmatu balu, sekulako jipoia lortuko zukeen.

Nicok bi aukera garbi izan ditu, oso ondo landuak. Lehenengoa Matturrok atera du gol-marran eta bigarrena zutoinean jo du.

Robert Navarrok ere, mugimendu ikusgarri bat eginda, gutxigatik ez du beste bat sartu bere ezkerkadarekin.

0-2 erabakigarria atzetik egindako jokaldi bikain batean iritsi da. Guruzeta, Yuri, Navarro eta Berenguerrek ukitu dute baloia, Nicok Ryanen aurka buruz burukoan irabazi aurretik. Atezaina goitik gainditu du sareetara bidaltzeeko.

Unai Simonek egin du gainerako lana. Atsedenaldira iritsi aurretik, Etta Eyong-i geldiketa ona egin dio, eta bigarren zatian, Caleroren taldea estutu duenean, ikaragarri egon da. Ivan Romerori baliogabetutako gol bat lasaitasuna ekarri du. Eta Guruzetak 0-3koa izan du bere botan, Nicoren pase ederraren ondoren. Ez da beharrezkoa izan. Xabat, atariko ekitaldietan parte hartu duen Genuine taldeko jokalaria, harmailetan egondako zale zuri-gorriak bezain pozik zegoen. Orain Real Madrid taldea irabaztera egokitu da datorren asteazkenean, San Mamesen laguntzarekin.