CA Osasuna - Athletic Club

Athleticek berdinketa batekin amaitu du lehen itzulia Sadarren (1-1). Gorka Guruzetak zutoinaren ondoan jarritako jaurtiketak, Robert Navarroren pase bikaina jasota, etxetik at puntu bat lortzea ekarri du 2026ko hasieran, Ruben Garciaren lehen zatiko gol harrigarriak gauzak zaildu baditu ere.

Lehoiek jokoa hobetu beharko dute bigarren itzulian, hirugarren urtez jarraian Europa errepikatu nahi badute. Sailkapenean 24 puntu dituzte, eta helburua lortzeko askoz gehiago batu beharra dago. Beste kontu bat da Superkoparako Arabiara bidaiatu aurretik, Guruzetaren golak FC Barcelonaren aurkako partidara burumakur ez iristea ahalbidetzea.

Lehoiak lehen zatian ez dira batere fin ibili. Osasunak borroka guztiak irabazi ditu eta Budimir, Moncayola eta Torroren aukerekin abisatu du. Simonek lehen biak gelditu ditu, baina ez Ruben Garciaren urruneko falta jaurtiketa, 20.000 zale gorritxoak pozez leherrarazi dituena. Athleticek azken txanpan bakarrik mehatxatu du atsedenaldia baino lehen, Guruzetak, arratsalde osoan gogotsu, Herrera bi geldiketa egitera behartu duenean, horietako bat Nico Williamsen baloi solte batean, baina hegalekoak kanpora bidali du.

Bilbotarrak indartsu zelairatu dira atsedenaldiaren ostean, eta Herrerak zailtasunak izan ditu langan jo ondoren Iñaki Williamsek ezproiz egindako ekintza gelditzeko. Aldaketek indarra eman diote talde zuri-gorriari, eta zutoina ikutu duen Torroren eskuinkadaren ondoren, 1-1ekoa iritsi da: Robert Navarrok pasea maisutasunez eman dio Guruzetari partida berdintzeko. Lehoiek garaipena ere izan dute azken aurreko jokaldian, Nico Serranok atzera emandako pasean, baina Navarrok ez du baloia barrura sartu atzelari batean jo egin duelako. Atseden hartu eta FC Barcelona taldearen aurka ezustekoa bilatzea da helburua Yedan.