Atezainak gelditutako penalti batek, Gorkak urrezko minutu batean lortutako 1-0ekoari gehituta, laugarren postuan dagoen Athletic bultzatu du
Athletic Clubek agur esan die zaleei Sevillako finalaren aurretik, Deportivo Alavesen aurka 2-0eko emaitzaz landutako garaipenarekin. Babazorroei aurtengo denboraldian irabazitako hirugarren 2-0ekoak laugarren postuan utzi ditu lehoiak eta hor kokatuko da igande honetan Atleticok FC Bartzelonari irabazi ezean. Simonek metxa piztu du Luis Riojari ordu erdian gelditutako penalti batean, eta minutu bateko tartean, Gorka Guruzetak traka bota du 1-0ekoa jarriz. Bere Ligako hamahirugarren gola bost minutu geroago iritsi da. Hortik aurrera, Athleticek ez die aukerarik utzi Luis Garcia Plazaren jokalariei.
Alavesek lehen ordu erdian ezustean harrapatu ditu lehoiak. Iñaki Williamsek jokoz kanpo egindako gol bat izan ezik, kanpoko taldea eroso sentitu da. Oraingoan, Unai Simon izan da taldea bizkarrean hartu duena. Lehenik, Guridiren burukada hurbil-hurbiletik oinekin geldituta, Carlos Vicenteren erdiraketan.
Derbia Athletici mesede egin dioten ekintzen kateatze batean erabaki da. Nico Williamsek Gorosabeli egindako penalti batek egoera zailean jarri ditu lehoiak. Simonek Luis Riojari egindako gelditu bikainak RC Celtaren aurkako partidan gelditutakoa ekarri du gogora. Zerbaitegatik daramatza 15 partida atea hutsean.
Nicok minduta zirudien eta jokaldi ezagun bat asmatu du Guruzetari atzerako pasea egiteko. Honek bere maila osoa erakutsi du lehen zutoinera eskuinarekin gola sartzeko. Partida goitik behera aldatu da; une horretan Deportivo Alaves lur jota egon da, eta Yerayk Iñaki Williamsi emandako baloi luze bat Guruzetaren oinetara heldu da 2-0ekoa maisutasunez egiteko. Akabera izan da Alavesentzat.
Hortik aurrera, partida lasaia izan da lehoientzat, Deportivo Alavesek ez baitu talde zuri-gorria estutu. Yerayren irteera batean, 80. minutuan, Iñaki Williamsen aukera argia sortu da, baina Siverarekin topo egin du. Jokaldi berean Muniainek gora jaurti du.
Amaieran gozamena: taldea zelai osoa agurtzen, zaleek “A Sevilla, oé!” eta “Kopa da gurea!” abestu duten bitartean. Aurretik, geldialdian arnasa hartzea eta Real Madrili egin beharreko bisita prestatzea egokitu da, zaila bada ere, hazteko beste aukera ezin hobea baita. Finalak itxaron egin beharko du, lehenengo LaLiga dago.
