Deportivo Alavés - Athletic Club

Athletic Clubek bana berdindu du Mendizorrotzan Deportivo Alavesen aurka jokatutako derbi korapilatsuan. Taldea nagusi izan da une askotan, laster aurreratu da Unai Gomezek denboraldian sartu duen lehen golarekin, baina berdinketarena jaso du 67. minutuan, Joan Jordanek ate aurrean adi egon ondoren. Valverderen taldeari luzapenean gol bat baliogabetu diote, Sanchez Martinezek Vivianen falta adierazi duelako atzelariak baloia sareratu aurretik.

Taldea, Unai Simonek aurtengo Liga txapelketan debuta egin duen egunean, oso ondo sartu da partidara, eta Nicok aukera bat izan du 0-1ekoa heldu baino lehen. Galarreta eta Jauregizar nagusi izan dira jokoan, eta bermeotarrak jaurtiketa ona bidali du gora, zelai erdian lapurreta egin ondoren. Siverak berak ere sufritu du De Marcosek barrurantz bidalitako erdiraketan.

Yuri Adamaren ordez zelairatu da atsedenaldian eta Athletic jokoa hartuz joan da, Berenguerren gol aukera batez gozatu du... Hala ere, Guridiren jaurtiketa batean jaio da Jordanen gola, eta berdinketak zalantza batzuk sortu dizkio Athletici. Hala ere, ez du arriskurik izan eta Deportivo Alaves bere arean sartu du, baina aukera argirik gabe, aipatutako Vivianena izan ezik. Aste oso bat dago aurretik indarrak hartzeko Sadarren jokatuko den beste derbi bati aurre egiteko. Azken batean, beste puntu bat Athleticentzat laugarren postuari eusteko.