Athletic Club - Deportivo Alavés

Athletic Clubek golik gabe berdindu du San Mamesen Deportivo Alavesen aurkako derbia, 90 minutuetan bere erabateko nagusitasuna gol bihurtu ez duen partidan. Gainera, Siverak Sanceten penaltia asmatu eta gelditu du 69. minutuan. Ez dago sailkapenean gora igotzeko aukerarik geldialdiaren aurretik.

Norgehiagokaren gidoia beste neurketa batzuen antzekoa izan da: jokoaren erabateko kontrola eta defentsa-lan bikaina. Quique Sanchez Floresek zuzentzen duen taldeak ez du behin ere Unai Simon benetan estutasunean jarri.

Hala ere, Edin Terzicen jokalariek ez dute hainbesteko jabetzak merezi izan dituen aukera garbirik sortu. Jauregizarrek eta Robert Navarrok Sivera probatu dute lehen zatian, eta atezainak eskularruak ondo estututa izan ditu bi aukeretan.

Partida ordubetera iritsi denean, eta Terzicek aulkia astindu ondoren, Athletic goletik gertuago egon da. Yuriren jaurtiketa batekin arriskua sortu du, eta ondoren iritsi da Tenagliak Nico Williamsi egindako penaltia. Sancetek, askotan jokalari segurua honelakoetan, ez du asmatu.

Lehoiek ez diote saiatzeari utzi, eta Nico Serrano izan da garaipenaren gola sartzetik gertuen egon dena, denboraldi berri honetan debuta egin duen egunean. Athleticek agintzen du zelaian, baina emaitzak falta zaizkio sailkapenean gora egiteko.