Newcastle United - Athletic Club

Athletic Clubek 2-1 galdu du St James' Parken Newcastle Uniteden aurka. Talde ingelesa gaur egun landuago dago, baina bigarren zatian beherantz egin du  lehoien barneko jokoa eta hegaleko sarreren ondorioz. Raul Garciak zuri-gorrien gola sartu du eta berdinketa izan du zutoinera egindako jaurtiketa batekin. Hala ere, beste aukera pilo bat egon ziren markagailua orekatzeko, eta hori zen Athleticek merezi zuen gutxienekoa.

Newcastle izugarri bat, 46.000 ikuslek bultzatuta, oso indartsu atera da partidara eta Callum Wilsonen gol goiztiarrari esker aurretik jarri da. Iñaki Williamsek berdinketa izan du Berenguerren pase baten ostean, baina Guimaraesek zeraman jokoaren kontrola. De Marcosek abisua eman du urruneko jaurtiketa batekin, baina lehen zatiko abagune azpimarragarriena Berenguer eta Iñaki Williamsen arteko kontraeraso batean iritsi da, eta honek kanpora bidali du baloia Dubravkarekin buruz burukoan. Iruk, pare bat irteeratan ausart, ederki aritu da ere.

Lapsus bat kenduta, 53. minutuan Saint-Maximinen 2-0ekoa eragin duena, Athletic talde bikaina izan da bigarren zatian, Sancet eta Zarraga barrutik eta Iñaki Williams hegalean zituela. Aukerak pilatzen joan dira lehoiak, eta 64. minutuan Raul Garciaren 2-1ekoa iritsi da, denboraldiaurreko bere bigarren gola, Iñaki Williamsek bere buruan jarri duen alboko jokaldi bikain batean. Abaguneak bata bestearen atzetik etorri dira, Iñakiren beste bat, Berenguerren jaurtiketa bat (zutoina miazkatu du), Zarragaren jaurtiketa bat (zailtasunekin gelditu du atezainak) eta Raulen zutoin bat De Marcosen barnekaldi handiaren ondoren.

Athletic lan bikaina eginda itzuliko da Bilbora, benetako testa izan baitu Premierren hazi nahi duen talde baten aurka. Valverdek nahi duen tokian dauka taldea, elektrizitatearekin eta jokoarekin, eta jokalariek hamaikakoan toki bat lortzeko duten borroka interesgarriarekin.