RCD Mallorca - Athletic Club

Aukera ona xahutu dute, tamalez. Athletic Clubek puntu bat lortu du RCD Mallorcaren aurka golik gabe berdinduta. Etxekoak 22. minutuan hamar jokalarirekin geratu dira Samu Costari merezitako bigarren txartel horia aterata. Bosgarren postuan daude zuri-gorriak, baina bi puntu utzi dituzte Williams anaiei bi gol baliogabetu dizkioten gauan, eta beste aukera batean Nicok baloia langara bidali du.

Muriqiren hasierako sustoa alde batera utzita, ate aurrean egindako jaurtiketa Julenek oinarekin urrundu duena, Athleticek ez du sufritu Palman. Egia da Samu Costaren gehiegizko kartsutasunak lagundu duela, zigorra merezi izan baitu Galarretari egindako bi sarrera itsusi direla eta. Lehenengoan ere, Juan Martínez Munuerak ez dio gorria atera marrazainak epaileari deitu badio ere.

Baliogabetutako lehen gola 44. minutuan iritsi da, Iñaki Williamsek Nicoren buruan baloia jarri duenean. Atzeko pasea kanpotik egin duela zirudien.

Valverderen taldea zorrotzagoa izan da bigarren zatian. Zoritxarrez korner pila bat aprobetxatu barik gelditu dira. Baliogabetutako bigarren gola 74. minutuan heldu da. Berenguerrek orpoz Yuriri utzi dio eta bere pase bikaina Iñakik sarera bidali du baina jokoz kanpo.

Argiena handik gutxira iritsi da Nicok langara jaurti ondoren, Urrezko Baloia Sarian hamabosgarren jokalari onena izendatu duten egunean. Langan jo ostean Berenguerrek baloia harrapatu du eta ez du sareetara gurutzatu gutxigatik. Alexek bera eta Herrera, azken hau ezkerkada batekin, garaipenaren gola egiteko hari-harian egon dira. Hala ere, azkenean ez da heldu De Marcosek Txetxu Rojo aparta hirugarren lehoi gisa partidetan gainditu duen gauan.