Athletic Club - AZ Alkmaar

San Mamesek bonbazia-handian ospatu du. Gau osoan etengabe animatu duten 46.000 ikusletik gora Europako partida bat ikusteko gosez egon dira. Sei urte eta erdi Katedralean Europako txapelketa jokatu gabe egotea betierekoa izan da. Athletic Clubek bere garaipena landu du azken hogei minutuetan, Nico Wiliamsen bi ekintzekin: lehenengoan, ezkerrarekin Iñakiri oparitutako erdiraketa bikaina, eta bigarrenean, area barruan asmatutako jokaldi zoragarrian AZko atezainak urrundu du, baina baloia Sanceten oinetara joan da eta azken honek behin betiko 2-0ekoa egin du 85. minutuan.

Ez da erraza izan AZ Alkmaar. Txapelketa hauetan ez da ezer erraza. Izan ere, Athletic Club da Champions Leaguen eta Europa Leaguen arteko lehen bi jardunaldietan galdu ez duen LaLigako talde bakarra. Valverderen taldea oso indartsu atera da hasieratik, 20 minutu oso biziak izan dira eta erritmo handiarekin. Guruzetak buruz kanpora bota du eta Yurik ezkerkada ikaragarri bat langara bidali du. Atzeko hegalekoak berak, gau osoan ikaragarri, Owusu-Oduro atezainari beste abisu bat eman dio, eta honek urrundu du ahal izan duen moduan.

AZ Alkmaarrek bere talentu handiarekin abisatu du, Van Bommelekin. Baina hor egon da arreta osoz Julen Agirrezabala, ‘oranje’ koloreko elastikoarekin, behar izanez gero. Atsedenaldiaren ostean, Athleticek indarra berreskuratu du, lasaiago egon da eta garaipen garrantzitsua su motelean egosten joan da.

Nico arazoak sortzen hasi da bere hegaletik. Guruzetarentzat ekintza bikaina egin du, eta donostiarraren zartakoa atezainak kornerrera bidali du. Eta Jauregizarren baloi lapurreta baten ondoren, Nicok abiadura erabili du ezkerrez baloi ikaragarri bat anaiarentzat emateko, zeinak atezain bisitaria fusilatu duen. 2-0ekoa, Yuriren lapurreta ikaragarri batean heldu da, eta Nikok berriro ekin dio, taldera itzuli den Sanceten golarekin amaituz.

Lau puntu bi partidatan eta lehoiak tropeleko buruan daude jada fasearen laurdena bete denean. Baina hirugarren jardunaldian Pragako Slavia deserosoa hartu aurretik, lau punturekin ere bai, Girona bisitatzea egokitu da. Beste erronka bat.