Rayo Vallecano - Athletic Club

Athletic Clubek golik gabe berdindu du Vallecasera egindako bisitan, baina partida bilbotarren alde amaitzeko zorian egon da luzapenean, Nico Williamsek langan jo baitu ezkerkada batez kontraeraso batean, zale zuri-gorriek eta lehoien aulkiak gola oihukatu duten bitartean. Lehoiak zortzigarren postuan jarri dira sailkapenean eta Sanceten txartel gorriaren berri txarra izan dute azken txanpan ekintza zorrotz batean.

Julen Agirrezabala atezain zuri-gorriak protagonismo berezia hartu du, atezainentzat oso berezia izan den egunean. Futbolak Iribarri egindako omenaldia txalotzeko modukoa da. Jokalariek bere 1 dortsaladun ‘vintage’ kamisetarekin, inskripzioa eta guzti, zelairatu dira. Dimitrevski eta Agirrezabalaren argazkiarekin amaitu da keinu ederra, biak beltzez jantzita. Egia esan, bikain aritu dira eta atezain gipuzkoarrak partidako geldiketarik handiena egin du, Alvaro Garciaren jaurtiketan Raul de Tomasengan jo ondoren pozoitu den jokaldian.

Rayoren atezainak ere bere eskua atera du lehen zatian, Sanceten aukera garbi batean. Bere burukada ateko marratik kornerrera urrundu du. Egia da Rayok ere berea izan duela Alvaro Garcia kezkagarriak zutoinera bidalitako ezkerkada batean.

Partida orekatuta egon da: zuri-gorriak nagusi izan dira zenbait fasetan baina Rayok ere erantzuna eman du.

Athleticek aukera bikoitza izan du bigarren zatiko lehen ordu laurdenean Berenguerren eskutik. Lehenengoan, erdiraketa polita egin dio Nikori, baina honek ezin izan du sarera sartu, eta hurrengoan, lerro artean ondo mugitu den Sanceten asistentzia bat kanpora bidali du.

Julenek 82. minutuan egindako geldiketak eta Raul de Tomasek urrunetik emandako beste abisu batek okerrenaren beldurra sartu du gorputzean, baina Athleticek benetako kontraerasoa izan du neurketa irabazteko. Azkenean, berdinketa eta aurrera jarraitu beharra dago. Okerrena, Lekueren lesioa eta Sanceti erakutsitako gorria. Igandean partida handia dugu San Mamesen FC Barcelonaren aurka.