Athletic Club - RCD Mallorca

Athletic Clubek 4-0 jipoitu du RCD Mallorca denetan nagusi izan den partidan eta San Mamesen bere indar handia ziurtatuz. Sei garaipen jarraian lortu ditu etxean Liga txapelketan eta bosgarren postuan dago sailkapenean, gora begira. Yuri Berchicheren bi golek eta Guruzetak eta Muniainek sartutakoek markagailua apaindu dute zaleen gozamenerako. Orain Kopa dugu buruan, asteazkenean Atleticori egingo diogun bisitan jokatuko dugun finalerdi ikaragarri horrekin.

Dena ondo atera da. Izan ere, denboraldi honetan taldeari hainbeste kostatu zaion baloi geldiak gauzak erraztu ditu. Yuri Berchichek, kalitate handiko bi errematerekin Nicoren falta batean eta Guruzetak luzatutako kornerrean, 2-0ekoa jarri du 16. minuturako. Urrea diamantearekin. Aste honetan pletorikoa sentitzen dela aipatu du, eta partida honetan maisutasunez egindako bi kolperekin horixe frogatu du.

Ordu erdi aldera, Athletic hirugarrena egiteko zorian egon da. Gorka Guruzetari, jokoan bikain, burukada polita atera zaio De Marcosen erdiraketa batean, baina Rajkovicek geldialdi bikaina egin du. VARek Nicori egin ez dioten penaltia zuzendu du eta atsedenaldira lan erdia eginda joan dira Valverderen mutilak.

Onena da hirugarrena berehala sartzeko lehoiek gogoak jarri dituztela. Nicok, Yerayk, Yuriri sorbaldan eman ondoren zutoinean jo duen burukada batekin, eta Iñaki Williamsek, berriz jokatu duen Galarretaren pase bikain batean, gola egiteko aukera izan dute. Eta bitxia bada ere, Mallorcak sortu duen aukera bakarraren ondoren, Nacho Vidalen burukada Simonen eskuetara, hirugarrena heldu da adi egon den Guruzetaren bitartez kontraeraso batean. San Mameseko zaleen gozamena 4-0ekoarekin heldu da, Iker Muniainek sartuta. Oso ospatua izan da harmailetan, aldagelan eta baita kapitaina bera ere. Justizia hutsa. Gauak susto bakarra izan du, Williams anaiak amaitu baino lehen aldageletara joan direlako: Nicok iztondoan eta Iñakik orpoan minduta utzi dute soropila. Metropolitanon dena behar izango da partida ona egiteko.