CD Leganés - Athletic Club

Athletic kanpoan gora doa sailkapenean. Etxetik kanpo jarraian lortutako bigarren garaipenak, Leganesek lan handia eginez, 10 punturekin utzi ditu lehoiak, gora begira. Dani Vivianek, estrategia jokaldi baten ondoren, eta Iñaki Williamsek, Gorosabelek kontraerasora emandako pase bikaina jasota, balio handiko garaipena ekarri dute etxera talde pepinero sendoaren aurka.

Ez da gau erraza izan, eta gainera, Athleticek atsedenaldian Nico Williams galdu du, ordura arteko jokalaririk onena, lesio baten ondorioz. Izan ere, Rosierren sarrera baten ostean, Williamsek kolpea hartu du ezker orkatilan. Valverdek, partiden pilaketaren aurrean logikoa zen bezala, talde erdia txandakatu ditu, eta kostatu zaio Soriano atezainarenganako bidea aurkitzea. Bakarrik Djaloren jaurtiketa batek ozta-ozta mehatxatu du aurkarien atea. Beste atean, Julen Agirrezabalak bi aldiz esku hartu behar izan du, Miguel eta Hallerren jaurtiketekin.

Partida hasi baino lehen euri zaparrada bota du eta Athletic ez da eroso egon Borja Jimenezen taldearen aurka. Are gehiago, Nuñezen desbideratze batek zutoinean jo du Miguelen erdiraketa arriskutsuan. Ordubetera heldu aurretik Valverdek aldaketa guztiak egin ditu ate aurrean asmatu nahian, eta taldeak bidea aurkitu du.

Garaipena estrategia jokaldi bati esker bideratu da korner batean: Herrerak erdiratu, Guruzetak ikutu eta Vivianek, Jorge Saenzen laguntzaz, sareetara bidali du. Atzelari nternazionalak lehenago ere jo du langan atzerako artazi batean, baina epaileak gaizki baliogabetu du jokaldia, jokoz kanpo ez baitzegoen.

Athleticek hegaletik askatu du Gorosabel, eta bi opari handi jarri dizkio Iñakiri, bata goitik eta bestea behetik. Bigarrenean Iñaki Williamsek gol bikaina sartu du, denboraldiko lehena, orkatila maisutasunez zabalduz. Leganesek ez du amore eman, Hallerri jokoz kanpo egoteagatik gola kendu diote, eta Diegok zutoinean jo du. Nuñezek 0-3koa egiteko zorian egon da, baina zutoinera joan da. Ezin hobeto doa bidaietan bikain dabilen Athletic.