Deportivo Alavés - Athletic Club

Deportivo Alavesek 1 Athletic Clubek 0

Athletic Clubek 1-0 galdu du Deportivo Alaves taldearen aurka Mendizorrotzan. Theo Hernandezek egin du gol bakarra.

Irabazteko merituak egin eta partida galdu. Ez da lehendabiziko aldia izango, ezta azkena ere, baina gaurko neurketa eraginkortasun kontuaren eskutik laburbil daiteke.

Lehen zatian nagusitasuna, aukerak eta jokoa zuri-gorriak izan dira. Tamalez abagune garbiak ez dira gauzatu eta bigarren zatia bide beretik hasi arren, Hernandezen izugarrizko golak lehia aldapaz gora ipini du. Zuri-urdinak erosoago kokatu dira zelaian eta ahaleginak antzuak izan dira, bihotzarekin buruarekin baino.

Jardunaldi bi amaitzeko eta seigarren postuan segitzen dugu, baina bidea ez da samurra izango. Hurrengo erronka Leganesen aurka, igandean San Mamesen izango da. Partida horretan Laportek ezin izango du jokatu txartelak direla eta.