RCD Espanyol - Athletic Club

Athletic Clubek 1-2 irabazi dio RCD Espanyoli, Iñaki eta Nico Williamsen golei esker. Arratsalde ezin hobea izan da Europako aukerak indartzeko eta azken mende laurdeneko boladan perikitoen etxean ligan irabazi gabeko partidekin amaitzeko. Bi gol bikain izan dira: lehenengoan, anaia handienaren korrikaldi ikusgarria, eta bigarrenean, Nikok intentzioz egindako jaurtiketa egokia. Koparen kanporaketa krudela ahazteko sendagairik onena.

Partida oso parekatuta hasi da eta apurtu da Dani Garciak Iñakiri hutsunera bidali dionean, Pachecori jaurtiketa gurutzatu bikain batez gainditzeko. 21. minutuan izan da, eta lehoiek beste bi aukera izan dituzte, Vesga eta Sanceten eskutik. Espanyol ez da berriz agertutako Unai Simonengana hurbildu, baina lehen zatiko azken zatian Braithwatek gola sartu du. Hala ere, VARek Joseluren esku argia ikusi du Vivianekin izan duen lehian.

Lehoien onena bigarren zatian iritsi da, Valverderen mutilek argi izan baitute bigarrenaren bila joan behar zela. Ez da lehenago iritsi Pachecoren bi geldiketa handiengatik Guruzetak eta Iñaki Williamsek hurbil-hurbiletik jaurti ostean, azken hau Dani, Vesga eta Sanceten arteko taldekako jokaldi baten ondoren.

Gero, Nico Williams zelairatu da eta bere maila osoa erakutsi du. Lehenik, Guruzetak mirariz sartu ez duen jokaldi polit batean. Ondoren, 74.minutuan, Muniainek berarekin konektatu du eta Nikok baloiari gurpila eman dio sareetara bidaltzeko. Zale zuri-gorriek bere izena oihukatuz handikiro ospatu dute.

Muniainek hirugarrena egin zezakeen... eta nola ez, amaierara arte sufritu behar izan da Darderrek luzapenean egindako golagatik. Garaipena iritsi da, eta orain San Mamesen Errealaren aurkako derbia ondo prestatzea egokituko da, Europarako postuetara lehoiak are gehiago bultza ditzakeena.