Athletic Club - Cádiz CF

Athletic Clubek 3-0 garaitu du Cadiz CF, San Mamesen sekulako erakustaldia eman ondoren; are gehiago, gol-kopuru handiagoa lor zezakeen. Ezin omenaldi hobea izan da San Mames berriari hamarkada bat betetzean. Guruzeta, Villalibre eta Iñaki Williamsen golek garaipen ukaezina marraztu dute, balio handikoa, etxeko bigarren garaipena jarraian izan baita. Valverderen taldea sailkapenean goian dago, Mendizorrotzara egin beharreko bisitaren zain. Hau badoa aurrera.

Zuri-gorrien bakarrizketa izan da Cadizen aurka, talde andaluziarra sentsazio onekin etorri arren, partida hau jokatu arte FC Bartzelonaren aurka bakarrik galdu baitu. Lehen zatian Athleticek markagailuan aldeko emaitzaz jartzeko gol aukerak izan ditu, Sancetek langan bi aldiz jo ondoren; lehenengoa buruz Berenguerren erdiraketa bikain batean; eta bigarrena area barruan gorputzarekin nagusitasunez mugitu den jokaldian. Gola ez zen iristen, baina Valverderen taldeak ez du fedea galdu.

Athletic are zorrotzagoa izan da atsedenaldiaren ostean, izan ere, Iñaki Williamsek eta Guruzetak ez dute 58. minutuan sareetara baloia sartu mirarizko jokaldi berean, aipatutako bigarrenaren jaurtiketa atzelari batek marratik urundu baitu. Lehen aldiz Cadizek aurrera egin duen lehen jokaldian, Robert Navarro trebearen bitartez, Maxi Gomezek Simonen eskuetara bidali du, eta jarraian lehoiek helburua lortu dute.

De Marcosek, taldera kementsu itzuli dena, hegaletik egindako barneraldi batean erdiraketa bikaina bidali du Guruzetaren burura, donostiarrak bere hirugarren gol egin zezan bost partidatan. Txalo zaparrada jaso du bere lekua Villalibreri utzi dionean, eta zortearen lekukoa eman dio gernikarrari. Honek ere, buruz, intentzioz egindako ukitu batez, sareetara bidali du Iñakiren erdiraketa aurkari batek baloia desbideratu eta gero. 68. minutuan partida erabakita utzi du.

Athleticek ez du maila jaitsi eta hirugarrenaren bila joan da. Iñaki Williams behin baino gehiagotan ahalegindu da, 90. minutuan saria aurkitu duen arte, Villalibrek buruz baloia oparitu dionean. Pozez gainezka jarri da San Mames jokalari honen inguruan, txalo zaparrada berezia jaso baitu, baita Galarreta zoragarri batek ere, aldageletara joan denean. Simonek bi geldialdi handirekin amaitutzat eman du arratsaldea, bereziki Iza jokalariari esku gurutzatua atera dionean. Zuri-gorrien bultzada handia sailkapenean.