UD Almería - Athletic Club

Athletic Clubek berdinketa mingotsa lortu du Almerian, ordu erdiz jokalari bat gehiagoz jokatu duen arren; hala ere, denbora tarte horretan ez du aukera handirik sortu. Hori bai, bi izan ditu oso argiak, Paredesen burukada batean lehen zatian, eta Raul Garciaren beste batean, 86. minutuan. Bere ibilbidea 600. partidan handitu zezakeen, baina Herreraren erdiraketaren burukadak zutoinaren barrualdean jo du gola oihukatzen ari zenean.

Puntuarekin pozik geratu behar da, ez dago besterik. Lehoiak laugarren postutik bi puntura hurbiltzen ditu, orain Atleticoren eskuetan, eta okerrako izan zitekeen azken uneko kontraeraso batean Marezik baloia langara bidali baitu. Arnasa hartu eta Gironaren bisita astebetean prestatu behar da, eta partida horretan San Mamesek erasoko usaimena berreskuratzen lagundu beharko du.

Laster ikusi da gau zaila izango zela; izan ere, zehaztasun falta asko egon da, eta horrek erasoan erritmoa hartzea eragotzi du. Hasieran Vesgak ezkerkada batekin abisatu duen arren, lehoiek ez dute aukera argirik izan Paredesen burukada bikaina heldu arte, Unai Gomezen korner batean. Jokaldi horretan Maximianok argazki baterako urruntze ikusgarria egin du. Geroago, etxeko atezainak Villalibreren jaurtiketa bat geldiarazi du gorputzarekin. Simon lasai ikusi du neurketa, Lozanoren hurbileko erremate bat izan ezik.

Valverdek Raul eta Muniain zelairatu ditu atsedenaldiaren ostean, eta De Marcosek Ramazaniri bigarren txartel horia eragin dio, 52. minutuan. Horrek garaipenerako behin betiko urratsa zirudien, baina Athleticek ez du Gaizka Garitanoren taldea nahaspilatzeko modurik aurkitu. Gure taldeak hiru puntuak Raulen buruan izan ditu eta arnasa hartu du Almeriaren azken kontraeraso arriskutsuaren ostean.