SD Eibar - Athletic Club

Athletic Clubek sasoian jarraitzen du, eta denboraldiko ibilbidearekin zaleak liluratuta ditu. Lehoiek talde handi baten itxuraz gainditu dute SD Eibarri egindako Kopako bisita zaila. Atsedenaldirako 0-3 irabazten ari zen Valverderen taldea, Villalibrek sartutako bi golekin eta Muniainen beste planeta bateko golarekin. Gainerakoa, partidari aurpegia galdu gabe denbora pasatzen uztea izan  da. Bilbotarrak final-zortzirenetan daude jada.

Postuetarako lehia handituz, Txingurrik jokalari guztiek soropila zapaltzea lortu du, minutuak irabazteko gosez. Julen Agirrezabalaren gelditu bikainarekin hasi da dena, atezain handia itzalean, Aketxek loria oparitu dion Bautistari buruz burukoa irabaztean.

Lehoiak ez zeuden eroso, Eibar erasokorrarekin, eta Nico Williamsek bere gain hartu du lidertzaren rola. 17. minutuan Herrerak hegalekoaren bila jo du, eta azken honek Villalibre aurkitu du erdiraketa indartsua eginez. 0-1ekoak zerua argitu du euripean. Joseba Etxeberriaren jokalari ausartak suspertu barik oraindik zeudenean, Muniainek zelai osoa zeharkatu, Nicorekin konektatu eta Txantreakoak ezkerrez biratu eta eskuadrara jaurti du, Ipuruaren erdia isilaraziz eta gainontzekoen algarak sortuz.

Hori gutxi balitz bezala, Vivian erabakitasunez irten da baloi batekin 40. minutuan, Villalibre aurkitu du eta bere ezkerkada sareetan hil da Simicek desbideratu ondoren. Dena ezin hobeto joan da. Athleticek Kopa ohoratu du, eta indarrak gorde Realaren aurkako derbirako.

Bigarren zatian, Stoichkovek izan du lehen aukera argia, nahiz eta Athletic gola sartzeko zorian egon den Yuriren burukada batean eta Unai Gomezen jaurtiketa gogor batean. Muniain, oso motibatuta, beste bi bideojoko jokaldi egiten saiatu egin da... Raulek ere beste bat izan du. Zoriontasunak Athleticen darrai.